KİV: İranla əlaqəli haker qrupu İsrail dövlət qurumlarını hədəf alıb
İsrailin kibertəhlükəsizlik şirkəti "Check Point" İranla əlaqəli olduğu ehtimal edilən "Cavern Manticore" adlı yeni haker qrupunun fəaliyyətini ifşa edib.
Crossmedia.az xəbər verir ki, şirkətin araşdırmasına əsasən, qrup 2026-cı ilin əvvəlindən etibarən İsrailin dövlət qurumları və informasiya texnologiyaları şirkətlərinə qarşı kiberhücumlar təşkil edir.
Bildirilir ki, hakerlər qanuni uzaqdan idarəetmə və proqram təminatının yenilənməsi alətlərindən istifadə edərək şəbəkələrə gizli şəkildə nüfuz etməyə imkan verən mürəkkəb modul infrastrukturdan yararlanırlar.
Məlumata görə, hücumların əsas hədəfləri hökumət qurumları və İT xidmət təminatçıları olub.
"Check Point" hesab edir ki, "Cavern Manticore" qrupunun istifadə etdiyi üsullar əvvəllər İran Kəşfiyyat Nazirliyi ilə əlaqələndirilən "MuddyWater" və "Lyceum" haker qruplarının fəaliyyət üsullarına bənzəyir.
Tədqiqatçılar həmçinin bildirirlər ki, ABŞ-ın İrana qarşı hərbi əməliyyatları fonunda bu kiberhücumların intensivliyi artıb. Onların fikrincə, bu, haker qrupunun yüksək operativlik və dəqiqliklə fəaliyyət göstərdiyini göstərir.
11:11 08.07.2026
Oxunuş sayı: 50
