İran və ABŞ arasında danışıqların ilk mərhələsi uğurla başa çatıb
Pakistanın Baş naziri Şahbaz Şərif İsveçrədə İran və ABŞ nümayəndələri arasında keçirilən danışıqların ilk mərhələsinin müsbət nəticələndiyini açıqlayıb.
Crossmedia.az bu barədə xarici mediaya istinadən xəbər verir.
Şərif X sosial şəbəkəsində paylaşdığı məlumatda bildirib ki, İslamabad Memorandumu çərçivəsində yaradılmış Ali Komitənin ilk iclası konstruktiv atmosferdə keçib və tərəflər arasında bir sıra mühüm razılaşmalar əldə olunub.
Onun sözlərinə görə, əldə edilən əsas razılaşmalardan biri İran və ABŞ arasında 60 gün ərzində yekun sazişin imzalanmasını nəzərdə tutan yol xəritəsinin hazırlanmasıdır.
Baş nazir həmçinin qeyd edib ki, danışıqlar prosesinə siyasi nəzarətin təmin edilməsi və texniki məsləhətləşmələrin koordinasiyası məqsədilə Ali Komitənin yaradılması barədə də razılıq əldə olunub.
Şərif tərəflərin dialoqun davam etdirilməsi və yekun razılaşmanın əldə olunması istiqamətində fəaliyyətlərini davam etdirəcəklərini vurğulayıb.
18:35 22.06.2026
Oxunuş sayı: 57
