Çarpaz baxış,Sosium
Bu il yağışın bol olması kənd təsərrüfatına necə təsir edəcək?
Prezident İlham Əliyev kənd təsərrüfatı məsələlərinə həsr olunmuş müşavirədə deyib ki, bu gün anbarlarda yığılan su imkan verəcək ki, kənd təsərrüfatı üçün bu il su problemi olmasın.
Prezident qeyd edib ki, may ayında Bakıda hər halda belə yağışın yağmasını xatırlamır:
"Məndən yaşlı olan insanlar da, yəqin ki, xatırlamır. Artıq bu, əfsuslar olsun ki, bəzən fəsadlar törədir. Amma digər tərəfdən, bizim su ehtiyatlarımızı da böyük dərəcədə artırır və bu gün anbarlarda yığılan su bizə imkan verəcək ki, kənd təsərrüfatı üçün bu il su problemi olmasın".
Cross Media Təhlil Mərkəzinin analitiki, iqtisad üzrə fəlsəfə doktoru, dosent Aqil Eyvazov dövlət başçısının səsləndirdiyi fikirlər barədə Crossmedia.az-a açıqlamasında bildirib ki, Azərbaycanın aqrar siyasətində növbəti mərhələ artıq sadəcə ərzaq istehsalını artırmaq deyil, daha məhsuldar, texnologiyayönümlü və ixracyönümlü aqrar modelə keçid olacaq: "Prezident İlham Əliyevin müşavirədə vurğuladığı məsələlər və qəbul olunan 2026–2030 Dövlət Proqramı göstərir ki, əsas prioritetlər məhsuldarlığın artırılması, su və torpaq resurslarından daha səmərəli istifadə, aqrar emalın genişləndirilməsi və kənd təsərrüfatında rəqəmsal idarəetməyə keçiddir. Əvvəlki dövrlə müqayisədə yeni yanaşmanın ən vacib fərqi ondan ibarətdir ki, burada “daha çox istehsal” deyil, “daha səmərəli və yüksək əlavə dəyər yaradan istehsal” modeli ön plana çıxır. Dövlət Proqramında xüsusi olaraq intensiv istehsal, aqroparklar, ixracyönümlü aqrobiznes, aqrar emal, logistika, rəqəmsallaşma və süni intellekt əsaslı idarəetmə mexanizmləri prioritet kimi göstərilir. Bu isə o deməkdir ki, kənd təsərrüfatına artıq yalnız sosial məşğulluq sahəsi kimi deyil, iqtisadi rəqabət və strateji təhlükəsizlik sektoru kimi yanaşılır", - deyə dosent qeyd edib.
A. Eyvazovun fikrincə, gözlənilən odur ki, Azərbaycan aqrar siyasətdə ekstensiv modeldən intensiv, texnologiyayönümlü və ixracyönümlü inkişaf modelinə keçməyə çalışır: "Bu keçid uğurlu olarsa, həm ərzaq təhlükəsizliyi güclənə, həm regionlarda məşğulluq arta, həm də kənd təsərrüfatı qeyri-neft iqtisadiyyatının əsas dayaqlarından birinə çevrilə bilər".
Ətraf mühit məsələləri üzrə ekspert Rövşən Abbasov isə bildirib ki, Azərbaycanda son onilliklər quraqlıqla yadda qalırdı. Prezident də çox doğru olaraq bu məsələni vurğulayıb: "May ayında su çatışmırdı, məhsul tələf olurdu, əkin sahələri susuzluqdan yanırdı. Hətta ayrı-ayrı illərdə fermerlərə məhsul əkməmək belə məsləhət görülürdü. Bir fermer mənə müraciət edərək soruşmuşdu: "Böyük bir ərazidə pambıq əkmək istəyirəm, əkim, yoxsa yox?" Mən də ona demişdim ki, əgər suya əminsənsə, ək. Əmin deyilsənsə, əkmə. Prezidentin çıxışında toxunulan mühüm məqam da bundan ibarət idi: biz həmişə su çatışmazlığından əziyyət çəkmişik. Su anbarları dolmurdu, fermerlər çox böyük çətinliklərlə qarşılaşırdılar və bunun nəticəsində təsərrüfata ciddi ziyan dəyirdi".
Ekspert qeyd edib ki, bu il kifayət qədər yağıntılı oldu: "Doğrudur, yağıntıların mənfi nəticələrini də gördük. Bakı şəhərində, Abşeron yarımadasında, eləcə də rayonlarda daşqınların, su basmaların və sellərin şahidi olduq. Bəzən dolu şəklində yağış yağdı və təsərrüfata ciddi ziyan verdi. Amma müsbət tərəfi də var. Aran rayonlarımızda bu gün su çatışmazlığı problemi yoxdur. Su anbarları dolub, kanallar su ilə dolu gedir. İnsanlar istədikləri kənd təsərrüfatı məhsulunu əkirlər".
"Meteorologiyada "azsulu il" və "bol sulu il" terminləri var. Bu il bol sulu ildir. Belə illər bir-birini əvəz edir və bu il bolluq ili kimi yadda qalacaq. elBə hallar 1969-cu ildə də olub. 1914-1915-ci illərdə, 1890-cı illərdə də Azərbaycanda çox güclü yağıntılar düşüb. Bu da, əlbəttə ki, Xəzərin səviyyəsinə təsir edir. Xəzərin səviyyəsinin azalması prosesi ləngiyib. Hətta Xəzərin səviyyəsində 2-3 sm qalmanın olduğunu deyirlər. Yeni yağıntıların olması ümumilikdə müsbət haldır", - deyə o, izah edib.
Rövşən Abbasov qeyd edib ki, qış otlaqlarında bu il ot bol oldu: "İndi də bolluqdur. Fermalar yay otlaqlarına gedirlər, orada da ot çoxdur. Bu isə, əlbəttə ki, məhsulun çoxalmasına səbəb olacaq. Qış otlaqlarının və yay otlaqlarının qorunması da dolayısı ilə su təsərrüfatına yardım edir. Çünki ət istehsalı çox su tələb edən sahədir. Amma bizim ənənəvi əkinçiliyimiz ona imkan verir ki, sudan az istifadə edək".
Nigar Xəlilli
18:46 26.05.2026
Oxunuş sayı: 54
