Türk Mədəniyyəti və İrsi Fondunun prezidenti: Əcəmi Naxçıvaninin irsi beynəlxalq səviyyədə təqdim olunur
Bu bayram təkcə Azərbaycan üçün deyil, həm də Bakı şəhəri üçün xüsusi əhəmiyyət daşıyır.
Bu fikri Türk Mədəniyyəti və İrsi Fondu və Azərbaycan Memarlar İttifaqının birgə təşkilatçılığı ilə görkəmli memar Əcəmi Naxçıvaninin 900 illiyinə həsr olunmuş təqdimat mərasimi çərçivəsində Crossmedia.az-a açıqlamasında Türk Mədəniyyəti və İrsi Fondunun prezidenti Aktotı Raimkulova bildirib.
O, bu yubileyin yalnız Azərbaycan üçün deyil, bütün türk dünyası və ümumilikdə dünya mədəniyyəti üçün mühüm hadisə olduğunu qeyd edib: "Əcəmi Naxçıvani yalnız memar deyil, eyni zamanda böyük mütəfəkkir və sənətkar idi. Belə dahilər əsrlərin hikmətini öz şəxsiyyətlərində birləşdirərək onu sənət nümunəsinə çevirirlər. Bakıda fəaliyyət göstərən Türk Mədəniyyəti və İrsi Fondu Azərbaycan Respublikası Memarlar İttifaqı ilə birgə Əcəmi Naxçıvaniyə həsr olunmuş dəyərli bir kitab nəşr edib və bu gün həmin kitabın təqdimatı keçirilir. Kitab Rahibə Əliyevanın müəllifliyi və Azərbaycan Respublikası Memarlar İttifaqı ilə əməkdaşlıq çərçivəsində hazırlanıb. Türk Mədəniyyəti və İrsi Fondu layihəyə dəstək göstərərək nəşrin Azərbaycan, ingilis və rus dillərində çap olunmasını təmin edib. Bu isə kitabda yer alan zəngin elmi və tarixi materialların daha geniş auditoriyaya çatdırılmasına imkan yaradır. Xüsusilə qeyd etmək istərdim ki, bu gün Azərbaycanda keçirilən təqdimat artıq beynəlxalq miqyasda böyük maraq doğurmuş layihənin davamıdır. Belə ki, 15 dekabr 2025-ci ildə UNESCO-nın Parisdəki qərargahında kitabın və Əcəmi Naxçıvani irsinin qlobal təqdimatı keçirilib. Həmin tarix Türk Dillərinin Birliyi Gününə təsadüf edirdi. Tədbir çərçivəsində Əcəmi Naxçıvaniyə həsr olunmuş sərgi təşkil olunub, müxtəlif dillərdə təqdimatlar keçirilib, memarlar və tədqiqatçılar onun yaradıcılığı haqqında çıxış ediblər, həmçinin əsərlərinə həsr olunmuş dəyirmi masa təşkil edilib. Bu gün artıq əminliklə deyə bilərik ki, Əcəmi Naxçıvaninin irsi beynəlxalq səviyyədə təqdim olunur və türk ölkələrində, eləcə də dünyanın müxtəlif yerlərində geniş şəkildə tanıdılır. Azərbaycan Respublikasının Prezidenti İlham Əliyevin təşəbbüsü ilə yaradılmış Türk Mədəniyyəti və İrsi Fondu olaraq, böyük Əcəmi Naxçıvaninin 900 illik yubileyinin qeyd olunmasına töhfə verməkdən qürur duyuruq. Türk mədəni irsinin qorunması, təbliği və gələcək nəsillərə çatdırılması istiqamətində fəaliyyətimizi bundan sonra da davam etdirəcəyik".
Elmir Heydərli
19:27 08.05.2026
Oxunuş sayı: 43
