Nikbin düşüncə beynimizin fəaliyyətinə necə təsir edir? - Alim açıqladı
Nikbin düşüncə və ümumi psixoloji durumun insan beyninin fəaliyyətinə və yaddaş proseslərinə təsiri müasir nevropsixologiyada geniş araşdırılan mövzulardandır. Belə ki, emosional vəziyyət təkcə əhval-ruhiyyəyə deyil, həm də diqqət, yaddaş və koqnitiv funksiyaların işləmə sürətinə birbaşa təsir göstərir. Bu baxımdan, psixoloji sağlamlıq beynin normal fəaliyyətinin qorunmasında mühüm rol oynayan amillərdən biri kimi qiymətləndirilir. Koqnitiv zəifləmənin qarşısının alınması üçün isə həyat tərzi və gündəlik vərdişlər xüsusi əhəmiyyət daşıyır.
Crossmedia.az-a danışan tibb elmləri doktoru, professor Adil Qeybulla bildirib ki, istənilən orqanın fəaliyyət mexanizmi müxtəlif maneələr nəticəsində pozula bilər:
“Beyin insanın birbaşa davranış və ünsiyyətinə cavabdeh olduğu üçün onun patologiyası dərhal hiss olunur. Yaddaşın zəifləməsi, intellektual geriləmə kimi əlamətlər müşahidə edilə bilər. Bundan əlavə, ürək və böyrək xəstəlikləri adətən müayinələr nəticəsində aşkarlanır. Hər bir orqanın funksional yükü var və bu yük daim təmin edilməlidir. Beyin mütəmadi olaraq işləməli, ürək fəaliyyət göstərməli, böyrəklər isə süzmə funksiyasını yerinə yetirməlidir. Funksional yük olmadıqda beyində deqradasiya və geriləmə baş verir”.
Adil Qeybulla əlavə edib ki, təkcə funksional yük orqanın taleyini müəyyən etmir:
“Müxtəlif xəstəliklər orqanın strukturunu zəiflədir, onu zədələyir və funksiyasını pozur. Bu proseslər təkcə nevroloji deyil, həm də patoloji mexanizmlərlə bağlıdır”.
Fatimə
19:02 23.04.2026
Oxunuş sayı: 52
