Qan kifayət qədər varsa, niyə bəzən tapılmır? - həkim açıqlayır
Respublika Qan Bankında qan və qan komponentləri ilə bağlı mövcud vəziyyətin stabil olduğu bildirilir.
Qurum rəsmisinin sözlərinə görə, ehtiyatların kifayət qədər olması qana ehtiyacı olan şəxslərin vaxtında təmin edilməsinə imkan yaradır.
Qeyd olunur ki, qan tədarükü, saxlanması və təhlükəsizliyinin təmin edilməsi əsas prioritet istiqamətlərdəndir.
Xüsusilə, hemofiliyadan əziyyət çəkən şəxslər üçün qan ehtiyatı daim nəzarətdə saxlanılır və onların müalicə ehtiyaclarının qarşılanması təmin olunur.
Məsələ ilə bağlı tibb üzrə fəlsəfə doktoru, həkim onkoloq Fərid Museyibov Crossmedia.az-la öz fikirlərini bölüşüb:
"Bəli, Qan Bankında kifayət qədər qan mövcuddur. Lakin bir mühüm məqamı unutmaq olmaz: qan qrupları faktoru. Məlumdur ki, dörd əsas qan qrupu mövcuddur və bəzi qruplar digərlərinə nisbətən daha çox yayılıb.
Adətən III və IV qan qrupları üzrə çatışmazlıq daha çox müşahidə olunur. Elə hallar olur ki, intensiv istifadə nəticəsində müəyyən qan qrupları üzrə ehtiyat azalır.
Nəzərə almaq lazımdır ki, əhali sayı artdıqca, paralel olaraq xəstəliklərin sayı da çoxalır. Bu səbəbdən, nə qədər geniş qan ehtiyatı olsa belə, bəzən tələbatı tam ödəmək mümkün olmur. Bu zaman insanlarda “qan kifayət qədərdirsə, niyə təmin edilmir?” kimi suallar yaranır.
Digər mühüm məqam isə bəzi xəstəliklərin uzunmüddətli qan tələbatı ilə bağlıdır. Məsələn, talassemiya, onkoloji və sümük iliyi ilə əlaqəli xəstəliklərdən əziyyət çəkən pasiyentlər illərlə davamlı qan köçürülməsinə ehtiyac duyurlar.
Xüsusilə qeyd edilməlidir ki, son dövrlərdə uşaqlar arasında qan xərçəngi hallarında artım müşahidə olunur. Bu isə qan ehtiyatının yetərli olmasına baxmayaraq, həm uyğun qrupun tapılmaması, həm də ümumi tələbatın yüksək olması səbəbindən çatışmazlıq problemini daha da aktuallaşdırır".
Elmir Heydərli
12:05 20.04.2026
Oxunuş sayı: 577
