Amerikalı milyarder İlon Mask Polşanın xarici işlər naziri Radoslav Sikorskinin Ukrayna münaqişəsi fonunda səsləndirdiyi ittihamları kəskin şəkildə rədd edib.
Crossmedia.az bu barədə xarici mediaya istinadən xəbər verir.
Məlumata görə, Sikorski X sosial şəbəkəsində Maskdan Rusiya hərbçilərinin Starlink peyk rabitə sistemindən istifadəsinin niyə dayandırılmadığını soruşub. Nazir eyni zamanda Maskın “müharibə cinayətlərindən qazanc əldə etdiyini” iddia edib.
Buna cavab olaraq İlon Mask bildirib ki, Sikorskinin ittihamları əsassızdır və Starlink Ukrayna ordusunun kommunikasiya sisteminin əsasını təşkil edir.
Qeyd olunur ki, 2025-ci ilin mart ayının əvvəlində də tərəflər X platformasında Starlink mövzusu ətrafında qarşıdurma yaşamışdılar. Mask o zaman Ukraynadakı Starlink terminallarının bağlanmasının cəbhə xəttinin çökməsinə səbəb ola biləcəyini qeyd etmişdi. Sikorski isə buna cavab olaraq Kiyev üçün alternativ rabitə provayderi tapıla biləcəyini bildirmişdi.
Bu müzakirələr fonunda ABŞ dövlət katibi Marko Rubio Vaşinqtonun Ukraynanı Starlink sistemindən ayırmaq niyyətində olmadığını açıqlayıb. Mask isə Sikorskinin sərt açıqlamalarına cavab olaraq onu “kiçik adam”, daha sonra isə maliyyəçi Corc Sorosun təsiri altında olmaqda ittiham edib.
