Pezeşkian ABŞ sanksiyalarına qarşı BRICS-i hərəkətə çağırdı
İran Prezidenti Məsud Pezeşkian BRICS ölkələrini ABŞ-nin İrana qarşı tətbiq etdiyi birtərəfli sanksiyalara qarşı mübarizəni prioritet məsələ kimi nəzərdən keçirməyə çağırıb.
Crossmedia.az xəbər verir ki, bunu Pezeşkian Yeni Dehlidə keçirilən 18-ci BRICS Liderlər Zirvəsində çıxışı zamanı deyib. O bildirib ki, ölkələrin inkişafını, uşaqların həyatını, xəstələrin sağlamlığını və insanların dolanışığını hədəf alan sanksiyalar “qeyri-insani” xarakter daşıyır.
Pezeşkian regionda davamlı təhlükəsizliyin dövlətlərin bir-birinin suverenliyinə hörmət etməsindən asılı olduğunu vurğulayıb. O, heç bir ölkənin ərazisinin qonşularına qarşı hücumlarda istifadəsinə icazə verilməməli olduğunu bildirib.
İran prezidenti həmçinin BRICS-in mülki infrastruktura və dinc nüvə obyektlərinə hücumların normallaşdırılmasına qarşı açıq mövqe nümayiş etdirməsini istəyib. Onun sözlərinə görə, elm, texnologiya, enerji və ərzaq təhlükəsizliyi sahələrində əməkdaşlığın gücləndirilməsi cənub ölkələrinin maraqlarına xidmət edəcək.
02:35 13.09.2026
Oxunuş sayı: 53
