Cənubi Qafqaz
Aİ-dən Ermənistana hərbi dəstək: Brüssel Cənubi Qafqazda balansı pozur!
Avropa İttifaqının (Aİ) Ermənistandakı hərbi infrastrukturun və ehtiyatda olan hərbçilərin hazırlıq imkanlarının artırılmasına maliyyə dəstəyi ayırması bölgədəki kövrək sülh prosesi və güc balansı baxımından ciddi suallar doğurur. Ermənistanın müdafiə naziri Suren Papikyanın parlamentdə hökumət saatı zamanı açıqladığı kimi, Aİ-nin maliyyə vəsaiti hesabına ehtiyatda olan hərbçilərin 25 günlük təlim toplanışları üçün xüsusi çadır düşərgəsi inşa edilir. Brüsselin Ermənistandakı revanşist meyilləri dolayısı ilə stimullaşdıran bu addımı Aİ-nin regional siyasətində neytrallıq prinsipindən uzaqlaşdığını və təhlükəsizlik arxitekturasında disbalans yaratdığını göstərir.
Avropa İttifaqının Ermənistana verdiyi maliyyə yardımlarının mahiyyətini, Brüssellə danışıqlarda balans prinsipinin qorunmasının vacibliyini və əhali faktorunu Crossmedia.az-a sabiq xarici işlər naziri Elmar Məmmədyarov şərh edib:
"Avropa İttifaqının Ermənistana və ya regionun digər ölkələrinə ayırdığı vəsaitlərin birbaşa maliyyələşdirmə, yoxsa xüsusi təyinatlı proqramlar çərçivəsində həyata keçirilməsi mütləq dəqiqləşdirilməlidir. Keçmiş təcrübələr də göstərir ki, Brüssellə aparılan danışıqlar zamanı əsas diqqət regionda qüvvələr balansının qorunmasına yönəldilməli idi. Ermənistana hər hansı xüsusi maliyyələşmə və ya təhlükəsizlik zəmanəti verilərkən, eyni yanaşma analoji şəkildə Azərbaycana da tətbiq olunmalıdır".
E.Məmmədyarov regional sabitlik üçün əhalinin say göstəricilərinin və strateji maraqların nəzərə alınmasının mühüm şərt olduğunu vurğulayıb:
"Ölkələrin əhali sayındakı fərqlərə – Ermənistanda təxminən 2 milyon, Azərbaycanda isə 10 milyondan çox əhalinin olmasına baxmayaraq, strateji və təhlükəsizlik xarakterli məsələlərdə hər iki ölkənin maraqları eyni dərəcədə nəzərə alınmalıdır. Əməkdaşlıq proqramları müvafiq balans əsasında qurulmalıdır. Bu yanaşma Cənubi Qafqazda sabitliyin qorunması və beynəlxalq aktorların bölgədəki ölkələrə münasibətdə ədalətli mövqe sərgiləməsi baxımından mühüm əhəmiyyət daşıyır".
Zeynəb Həsən
20:00 30.10.2026
Oxunuş sayı: 57
