Avropa,Cənubi Qafqaz
Hərbi ekspert: "Slovakiya ilə hərbi əməkdaşlıq Ordumuz üçün yeni mərhələdir"
Azərbaycan Respublikasının müdafiə naziri general-polkovnik Zakir Həsənovun ölkəmizdə rəsmi səfərdə olan Slovakiya Respublikası Silahlı Qüvvələrinin Baş Qərargah rəisi ilə keçirdiyi mühüm görüş iki ölkə arasında hərbi müstəvidə tərəfdaşlığın keyfiyyətcə yeni müstəviyə keçdiyini göstərir. Görüşdə hərbi, hərbi-texniki, hərbi təhsil və müdafiə sənayesi sahələrində əməkdaşlığın genişləndirilməsi, eləcə də birgə layihələrin reallaşdırılması istiqamətində strateji məsələlər müzakirə olunub. BMT və NATO standartlarına uyğunlaşan, eyni zamanda 44 günlük Vətən müharibəsində modern döyüş təcrübəsi qazanan Azərbaycan Ordusu üçün Avropa ölkələri ilə bu cür ikitərəfli əlaqələrin dərinləşməsi böyük əhəmiyyət kəsb edir.
Azərbaycan Silahlı Qüvvələrinin xarici hərbi əlaqələrinin tarixini, Slovakiya ilə tərəfdaşlığın dividendlərini və təcrübə mübadiləsinin ordunun inkişafındakı rolunu Crossmedia.az-a Əməkdar jurnalist, hərbi ekspert İbrahim Rüstəmli şərh edib:
"Ordunun inkişafı qarşılıqlı təcrübə mübadiləsi əsasında baş tutur. Azərbaycan Ordusu yarandığı gündən indiyə kimi onun beynəlxalq əlaqələrinin inkişafında Ulu Öndər Heydər Əliyev çox böyük rol oynayıb. 1993-cü ildən sonrakı dövrdə Silahlı Qüvvələrimizin hüquqi bazası yaradılıb, kadr potensialının gücləndirilməsi istiqamətində strateji addımlar atılıb və hərbi qulluqçuların statusu haqqında müvafiq qanunlar qəbul edilib. Həmin dövrdən Silahlı Qüvvələrin xarici əlaqələrinin inkişafı prioritet məsələ olaraq gündəmə gətirilib. O zamandan bu günümüzədək Azərbaycan NATO sistemi və qardaş Türkiyə başda olmaqla, Almaniya, Rusiya, ABŞ və digər böyük dövlətlərlə müxtəlif səviyyələrdə hərbi əlaqələr qurub".
Hərbi ekspert beynəlxalq əlaqələrin ordunun modernləşməsində oynadığı həlledici rolu və Slovakiya ilə tərəfdaşlığın spesifik tərəflərini diqqətə çatdırıb:
"Ordunun inkişafını şərtləndirən əsas cəhətlərdən biri beynəlxalq əlaqələrin inkişafıdır. Çünki bu əlaqələr vasitəsilə biz dünyada hərbin inkişafını və tərəqqisini şərtləndirən yeniliklərlə tanış oluruq. Böyük dövlətlərin hərbi sənayesində əldə olunmuş uğurların müəyyən hissəsi bu gün Slovakiyada tətbiq olunur və sınaqdan keçirilir. Bu mənada Slovakiya ilə hərbi əlaqələrimizin bu şəkildə formalaşması ordumuz üçün çox müsbət tendensiyadır. Düşünürəm ki, bu əlaqələr Azərbaycan Silahlı Qüvvələrinin həyatında yeni bir mərhələnin başlanğıcı kimi tarixə düşəcək".
İbrahim Rüstəmli hərbi əməkdaşlığın həm də dövlətlərarası siyasi münasibətlərin göstəricisi olduğunu vurğulayaraq fikrini yekunlaşdırıb:
"Hərbi əlaqələr sadəcə kiminsə gedib yeni texnikaya baxması ilə məhdudlaşmır. Bu, həm də birgə hərbi təlimlər və intellektual təcrübə mübadiləsi deməkdir. Mən özüm də orduda xidmət edərkən Türkiyə, Almaniya, Polşa və digər ölkələrdə bu cür tədbirlərdə iştirak etmişəm və praktiki əhəmiyyətini şəxsən görmüşəm. Hərbi əlaqə həm də iki dövlət arasında siyasi münasibətlərin formalaşmasıdır, çünki hər bir ordu mənsubu öz dövlətinin simasıdır. Slovakiya ilə əlaqələr bizim orada, Slovakiyanın isə Azərbaycandakı təqdimatıdır. Əminəm ki, təkcə biz yox, Slovakiya tərəfi də Azərbaycanın 44 günlük Vətən müharibəsində və ondan sonrakı dövrdə qazandığı zəngin praktiki döyüş təcrübəsini öyrənməkdə böyük maraq sahibidir".
Zeynəb Həsən
16:30 30.10.2026
Oxunuş sayı: 114
