Cənubi Qafqaz
Regional əməkdaşlıq üçün yeni öhdəlik: Ermənistan "yox" desə nə olacaq?
Ermənistanın ətraf mühit naziri Ambartsum Matevosyanın delimitasiya prosesindən sonra Azərbaycan və regionun digər qonşu ölkələri ilə transsərhəd ekoloji layihələrin həyata keçirilməsinə ümid etdiyini bildirməsi diplomatik xətdə yeni bir müzakirə dalğası yaradıb. Uzun illər işğal dövründə Azərbaycanın təbii resurslarını amansızcasına talan edən, meşələri qıran, biomüxtəlifliyə ağır zərbə vuran və xüsusən Oxçuçayı sənaye tullantıları ilə zəhərləyərək regionda ekoloji fəlakət törədən İrəvanın bu gün birdən-birə "yaşıl gündəlikdən" danışması diqqət çəkməyə bilməz.
Ekoloji terrora imza atmış bir dövlətin bu cür təşəbbüslərlə çıxış etməsini rəsmi Bakı diqqətlə izləyir.
Bu məsələnin ekoloji, hüquqi və siyasi tərəflərini şərh edən Milli Məclisin deputatı Ülviyyə Həmzəyeva bildirib ki, Azərbaycan regionda davamlı sülhün, sabitliyin və qarşılıqlı faydalı əməkdaşlığın tərəfdarıdır: "Bu baxımdan ekoloji əməkdaşlıq Azərbaycan-Ermənistan münasibətlərində siyasi razılaşmaların praktiki nəticələrə çevrilməsi üçün mühüm istiqamət ola bilər.
Prezident İlham Əliyev transsərhəd çayların ekoloji təhlükəsizliyinin təmin olunmasının və bu sahədə regional əməkdaşlığın vacibliyini dəfələrlə vurğulayıb. Dövlətimizin başçısı ATƏT-in fəaliyyətdə olan sədrini qəbul edərkən transsərhəd çaylarla bağlı praktiki və praqmatik layihələrin həyata keçirilməsini mümkün əməkdaşlıq istiqaməti kimi qeyd edib".
Deputat İrəvanın vurduğu ekoloji ziyanın aradan qaldırılması üçün ilk növbədə atılmalı olan konkret ilkin addımları diqqətə çatdırıb:
"Belə əməkdaşlıq mövcud ekoloji problemlərin həllini də əhatə etməlidir. Ermənistan ərazisindən Azərbaycana axan çayların, xüsusilə Oxçuçayın çirklənməsi uzun illərdir ciddi narahatlıq doğurur. Prezident İlham Əliyev bu məsələni beynəlxalq platformalarda dəfələrlə gündəmə gətirib. İlkin mərhələdə transsərhəd su ehtiyatlarının qorunması, çirklənmə mənbələrinin müəyyənləşdirilməsi, birgə monitorinqin aparılması və şəffaf məlumat mübadiləsi üzrə razılaşmalar əldə olunmalıdır".
Ülviyyə Həmzəyeva İrəvanın sözdən konkret əməli işə keçməsinin Cənubi Qafqazda sülhə töhfə verəcəyini vurğulayaraq fikrini yekunlaşdırıb:
"Ətraf mühitə vurulmuş ziyanın qiymətləndirilməsi və ekoloji risklərin aradan qaldırılması də prosesin əsas istiqamətləri olmalıdır. Ermənistanın ekoloji layihələrlə bağlı niyyətlərini konkret öhdəliklərə və əməli addımlara çevirməsi qarşılıqlı etimadı gücləndirə, Cənubi Qafqazda davamlı sülhə və regional əməkdaşlığa töhfə verə bilər".
Zeynəb Həsən
19:30 28.10.2026
Oxunuş sayı: 61
