Qalın geyinmək kifayət deyil: soyuq havada nələrə diqqət etməliyik?
Havanın qəfil soyuması gündəlik həyatımıza təsir göstərməklə yanaşı, geyim
seçimimizi də dəyişməyə məcbur edir. Xüsusilə payız və qış aylarında
temperaturun qısa müddət ərzində aşağı düşməsi səhər evdən çıxarkən seçdiyimiz
geyimin gün ərzində hava şəraitinə uyğun gəlməməsinə səbəb ola bilər. Bəzən
soyuqdan qorunmaq üçün kifayət qədər qalın geyinmirik, bəzən isə əksinə,
həddindən artıq qalın geyim seçərək tərləməyə və narahatlığa yol açırıq.
Nəticədə, adi görünən geyim seçimi gün ərzində özümüzü necə hiss etməyimizə
təsir edən amillərdən birinə çevrilir.
Hava şəraitinin dəyişməsi xüsusilə gün ərzində uzun müddət açıq havada olan,
ictimai nəqliyyatdan istifadə edən və işə və ya təhsil müəssisəsinə piyada
gedən insanlar üçün daha çox hiss olunur. Səhər saatlarında aşağı temperaturla
qarşılaşan insan günorta havanın nisbətən isinməsi ilə geyimində narahatlıq
yaşaya bilər. Küləkli və rütubətli hava isə temperatur göstəricisi çox aşağı
olmasa belə, soyuğun daha kəskin hiss edilməsinə səbəb ola bilər. Buna görə də
geyim seçərkən yalnız termometrdəki rəqəmə deyil, gün ərzində gözlənilən hava
şəraitinə də diqqət yetirmək lazımdır.
Digər mühüm məqam isə geyimin qalınlığından əlavə, onun materialı və bədəni
soyuqdan qoruma xüsusiyyətidir. Bir neçə qat geyim seçmək, ehtiyac yarandıqda
üst geyimini çıxarıb yenidən geyinmək hava dəyişikliklərinə uyğunlaşmağı
asanlaşdıra bilər. Bununla yanaşı, soyuq havada uzun müddət qalmaq, bədənin nəm
qalması və küləyin təsirinə məruz qalmaq sağlamlıq baxımından əlavə diqqət tələb
edir. Xüsusilə uşaqların və yaşlıların geyim seçiminə daha həssas yanaşmaq
vacibdir.
Temperaturun aşağı düşməsi təkcə gündəlik rahatlıq məsələsi deyil, həm də sağlamlığın qorunması baxımından əhəmiyyət daşıyır. Soyuq hava orqanizmin istilik tarazlığına təsir göstərə bilər, uyğun olmayan geyim isə bədənin soyuğa məruz qalmasını asanlaşdıra bilər. Bu baxımdan, havaya uyğun geyinmək, bədəni həddindən artıq soyumaqdan qorumaq və gün ərzində dəyişən şəraitə hazır olmaq mühüm əhəmiyyət kəsb edir.
Məsələ ilə bağlı Crossmedia.az-a açıqlama verən terapevt və kardioloq
Nərminə Abbasova bildirib ki, hava dəyişiklikləri xroniki xəstəliklərin
kəskinləşməsinə səbəb ola bilər.
“Xroniki xəstəliklər arasında xüsusilə dayaq-hərəkət sistemi xəstəliklərini
qeyd etmək olar.
Digər tərəfdən, infeksion və virus xəstəliklərinin artması, onların
yayılmasının sürətlənməsi, immunitetin zəifləməsi və qan dövranında baş verən
dəyişikliklər də orqanizmin ümumi vəziyyətinə təsir göstərir. Soyuqdəymə
əlamətləri yarandıqda bəzi xəstəliklərin kəskinləşməsi müşahidə oluna bilər.
Ən çox aktivləşən xəstəliklərdən biri dayaq-hərəkət sistemi xəstəlikləridir.
Ümumiyyətlə, keçirilmiş infeksion və virus xəstəliklərindən sonra bu sistemlə
bağlı problemlərin artması mümkündür. Həmçinin, insan hər hansı virusa
yoluxubsa, havanın kəskin soyuması xəstəliyin daha ağır keçməsinə təsir göstərə
bilər.
Buna görə də havaların soyuması ilə əlaqədar geyim seçiminə, qidalanmaya və
yuxu rejiminə ciddi diqqət yetirmək lazımdır. Mövsümi hava dəyişiklikləri təbii
prosesdir. Xəstəliklərdən qorunmaq üçün ilk növbədə hava şəraitinə uyğun
geyinmək, düzgün qidalanmaq və yuxu rejiminə əməl etmək vacibdir. Hazırda virus
və infeksion xəstəliklərin geniş yayıldığını nəzərə alsaq, hər kəs mümkün
qorunma tədbirlərinə əməl etməlidir.
Virus xəstəliklərinə yoluxan şəxslərə isə başqaları ilə təmaslarını
azaltmaq, iş yerlərinə, ticarət mərkəzlərinə və digər ictimai məkanlara
getməkdən çəkinmək tövsiyə olunur. Bu, xəstəliyin cəmiyyətdə yayılmasının
qarşısını almaq baxımından əhəmiyyətlidir. Xəstəliyin ağırlığından asılı
olaraq, tibbi məsləhətə uyğun müalicə və izolyasiya tədbirləri görülməlidir.
İmmunitetin normal fəaliyyətini dəstəkləmək vacibdir. Bu, həm yoluxma
riskinin azaldılmasına, həm də xəstəlik baş verdikdə orqanizmin bərpa prosesinə
kömək edə bilər. Bəzən soyuqdəymədən sonra orqanizmdə müxtəlif xəstəliklərin
əlamətləri üzə çıxır. İnsanlar bu problemlərin səbəbini araşdırarkən əvvəlki
virus və ya infeksion xəstəliklərin də təsirini nəzərə almalıdırlar.
Bundan başqa, orqanizmdə əlamətsiz davam edən xroniki xəstəliklər də
infeksiyalardan sonra kəskinləşə bilər. Hava şəraitinə uyğun geyinməmək və
soyuğa uzun müddət məruz qalmaq isə bəzi insanlarda sağlamlıq problemlərini üzə
çıxara bilər.
Ona görə də bütün bu məsələlərə xüsusi diqqət yetirilməlidir. İstər
qidalanma, istər yuxu rejimi, istərsə də geyim seçimi sağlamlığın qorunmasında
mühüm rol oynayır. Eyni zamanda, viruslardan və infeksiyalardan qorunmaq üçün
profilaktik tədbirlərə əməl etmək lazımdır”.
17:20 28.10.2026
Oxunuş sayı: 347
