Cənubi Qafqaz
Mirzoyanın blefi, yoxsa reallıq? - Ermənistan Azərbaycanın şərtini qəbul etdi
Ermənistanın xarici işlər naziri Ararat Mirzoyanın TRIPP (və TRACECA marşrutu) layihəsinin Ermənistana Azərbaycan vasitəsilə üçüncü ölkələrlə əlaqə qurmaq imkanı verəcəyi barədə bəyanatı Cənubi Qafqazın nəqliyyat-logistika xəritəsində yeni diplomatik pərdəarxasını üzə çıxarıb. İrəvan rəhbərliyi Azərbaycanın regiondakı əvəzolunmaz tranzit rolunu dolayısı ilə etiraf etsə də, baş nazir Nikol Paşinyan komandasının indiyədək sözdən əməli işə keçməməsi, öz ərazisində layihə üzrə real addımlar atmaması bu bəyanatların sadəcə "sülhpərvər imic" yaratmaq kimi qiymətləndirilməsinə səbəb olur. Çünki Azərbaycan öz ərazisində bütöv infrastrukturu hazır vəziyyətə gətirdiyi halda, Ermənistan tərəfində faktiki olaraq hələ daş daş üstə qoyulmayıb.
Bəs bu layihənin reallaşması nəyi dəyişəcək? Qərblə Şərq arasında əsas dəhlizə çevrilən Azərbaycan üçün ən təməl şərt Naxçıvanla maneəsiz və etibarlı quru bağlantısının təmin edilməsidir. Ermənistan Azərbaycan üzərindən dəniz limanlarına və Türkiyə bazarlarına çıxış qazanmaq istəyirsə, rəsmi Bakının təhlükəsizlik və maneəsiz tranzit tələblərini yerinə yetirməyə məcburdur.
Bu fonda aktual sual ortaya çıxır: TRIPP (TRACECA) layihəsi reallaşarsa, Azərbaycanın regional tranzit mövqeyinə və Naxçıvanla bağlantısına hansı konkret iqtisadi üstünlükləri gətirəcək, İrəvanın bu çıxışı real addıma çevriləcəkmi?
Məsələ ilə bağlı Siyasi analitik Məhəmməd Cəbrayılov crossmedia.az-a danışıb.
"Ararat Mirzoyanın bu açıqlaması Azərbaycanın Cənubi Qafqazdakı aparıcı rolunun Ermənistanın qəbul etdiyini göstərir. Digər tərəfdən, İrəvan Bakı vasitəsilə üçüncü ölkələrə çıxış əldə etmək istəyirsə, Azərbaycanla normal münasibətlər qurmağın vacibliyini qəbul etməlidir. Çünki bu marşrut Azərbaycan və Türkiyə üzərindən Avropaya və dəniz limanlarına çıxışı əhatə edir. Əgər bu layihə üçüncü ölkələrə çıxış verməyəcəksə, onda layihənin mənası nə idi? Düşünürəm ki, Mirzoyan belə çıxış etməklə sadəcə blef edir, Ermənistanı sülhpərvər göstərmək istəyir. Çünki burada söhbət Azərbaycan ərazisindən, dəmir yollarından və Laçın koridoru imkanlarından istifadədən gedir. TRACECA Ermənistana Türkiyə və Azərbaycan üzərindən Şərqə və Qərbə böyük imkanlar açır".
Analitik Azərbaycanın əsas strateji marağının Naxçıvanla maneəsiz əlaqə olduğunu və layihənin ölkəmizə gətirəcəyi iqtisadi dividendləri vurğulayıb:
"Azərbaycanın marağı bu imkanların qarşılıqlı olmasındadır. Ermənistan Azərbaycan ərazisindən yeni bazarlara çıxış qazanırsa, Azərbaycan da öz əsas hissəsi olan Naxçıvanla etibarlı, maneəsiz bağlantı əldə etməlidir. Layihənin bizim üçün birinci və ən konkret əhəmiyyəti bununla bağlıdır. Naxçıvandakı sahibkarların ölkənin digər bölgələri ilə əlaqə imkanları genişlənir, vaxt və xərc baxımından böyük üstünlük yaranır. İkinci vacib məqam Azərbaycanın regional tranzit mövqeyinin güclənməsidir. Gürcüstan və Ermənistan üzərindən logistik şaxələndirmə aparmaqla seçim imkanlarımız və tranzit gəlirlərimiz kəskin artır. Limanlarımız, anbarlarımız və daşıma şirkətlərimiz üçün yeni iş yerləri və gəlir mənbələri formalaşır".
Məhəmməd Cəbrayılov İrəvanın artıq bəyanatlardan praktiki işə keçməsinin vacibliyini diqqətə çatdıraraq fikrini yekunlaşdırıb:
"Mirzoyanın açıqlaması Ermənistan rəhbərliyinin Azərbaycanla əməkdaşlığın onlara nə qazandıracağı ilə bağlı öz ictimaiyyətinə verdiyi dolayısı izahatdır. Bizim üçün əsas məsələ bu sözlərin əməli addımlara çevrilməsidir. Azərbaycan TRACECA layihəsində artıq öz ərazisində işləri tamamlayıb və başa çatdırır. Lakin Ermənistan ərazisində faktiki olaraq hələ daş daş üstə qoyulmayıb. Azərbaycanın marağı qarşılıqlı fayda verən, təhlükəsiz və davamlı işləyən bir sistemin qurulmasıdır".
Zeynəb Həsən
18:00 28.10.2026
Oxunuş sayı: 325
