Cənubi Qafqaz
Ermənistanla münasibətlərdə yeni qırmızı xətt: Türkiyə hərəkətə keçməlidir
Türkiyə ilə Ermənistan sərhədində yerləşən, X əsrə aid tarixi Ani körpüsünün (İpək Yolu körpüsü) bərpası üzrə tender prosedurlarının başa çatması və rəsmi müqavilənin imzalanması Ankara ilə İrəvan arasında normallaşma prosesinin növbəti praktiki addımı kimi qiymətləndirilir. İki ölkə arasında diplomatik münasibətlərin qurulması və sərhədlərin açılması məsələsi yenidən gündəmin ana xəttinə çevrilib. Lakin Ermənistanın dövlət gerbində Türkiyənin suveren ərazisi sayılan Ağrı dağının əks olunması və İrəvanın hələ də bu simvollardan imtina etməməsi Ankaranın milli maraqları baxımından ciddi suallar doğurur.
Mövzu ilə bağlı Crossmedia.az-a açıqlama verən politoloq Əhəd Məmmədli Türkiyə-Ermənistan sərhədlərinin açılması şərtlərini, Ermənistanın gerbindəki ərazi iddiasını və Ankaranın tutmalı olduğu strategiyanı şərh edib:
"Türkiyə ilə Ermənistan sərhədlərinin açılmasının lehinəyəm, amma bunu məhz Türkiyənin öz milli maraqları nöqteyi-nəzərindən dəstəkləyirəm. Azərbaycan artıq bəyan edib ki, biz suveren ölkəyik və Türkiyə də öz xarici siyasətində rahat şəkildə müstəqil qərarlarını verə bilər. Lakin burada əsas məsələ Ermənistanın Türkiyəyə qarşı gizli ərazi iddialarıdır. Ermənistanın dövlət gerbində Ağrı dağının təsvir olunması birbaşa ərazi iddiasıdır. Türkiyənin bu məsələni niyə indiyədək qabartmadığını tam anlamaq olmur. Təsəvvür edin, hansısa ölkənin gerbində başqa bir dövlətin tarixi qalası və ya şəhəri yer alsaydı, buna reaksiya çox sərt olardı".
Əhəd Məmmədli Ankaranın bu məsələdə qətiyyətli mövqe ortaya qoymalı olduğunu və gerb dəyişmədən münasibətlərin normallaşmasının risklərini vurğulayıb:
"Türkiyə bu məsələnin üstünə getməlidir. Ermənistanın gerbi dəyişdikdən və rəsmi İrəvan ərazi iddialarından tam imtina etdikdən sonra Türkiyə sərhədləri aça və diplomatik münasibətlər qura bilər. Bu şərt ödənilmədən sərhədlərin açılması Türkiyənin maraqlarına ziddir. Türkiyə gerb məsələsinə Ermənistanla münasibətlərdə qırmızı xətt kimi yanaşmalı və bunu açıq tələb etməlidir. Yalnız bundan sonra sərhədlərin açılması və diplomatik əlaqələrin qurulması Ankaranın strateji maraqlarına tam cavab verər".
Zeynəb Həsən
19:30 26.10.2026
Oxunuş sayı: 58
