Cəmiyyət
Valideynlərin diqqətinə - Uşaqlar arasında yeni virus yayılıb
Mövsümi xəstəliklər istər azyaşlılar istərsə də yetişkinlər arasında yayılmağa davam edir. Xüsusilə də söhbət uşaqların səhhətindən getdikdə bu narahatlıq daha da artır. Sumqayıtın Ceyranbatan qəsəbəsində yerləşən 2 nömrəli tam orta məktəbdə şagirdlərin səhhətində yaranan qəfil problemlər əvvəlcə kütləvi zəhərlənmə şübhəsi doğursa da, sonradan aparılan müayinələr fərqli mənzərə ortaya çıxarıb. Hadisə ilə bağlı tibbi yardım göstərilən şagirdlərdə rotavirus infeksiyasının aşkarlanması məktəblərdə yoluxucu xəstəliklərin yayılması və uşaqların sağlamlığının qorunması məsələsini yenidən gündəmə gətirib. Bu virusdan narahat olmalıyıqmı? İlkin simptomları nələrdir?
Mövzu ilə bağlı Crossmedia.az-a açıqlama verən Terapevt Zakir Quliyev bildirib ki, rotavirus infeksiyasına ciddi yanaşmaq lazımdır, lakin bu, təşviş üçün əsas deyil:
"Əsas təhlükə qusma və ishal nəticəsində orqanizmin maye və duz itirməsi, yəni susuzlaşmadır. Bu risk xüsusilə körpələrdə və azyaşlı uşaqlarda daha yüksəkdir.
İlkin əlamətlər adətən yoluxmadan təxminən iki gün sonra başlayır. Qusma, qızdırma, sulu ishal, qarın ağrısı və iştahasızlıq əsas simptomlardır. Valideynlər uşağın ümumi vəziyyətinə və maye qəbuluna diqqət yetirməlidirlər. Sidiyin azalması, ağız quruluğu, ağlayarkən göz yaşının olmaması və qeyri-adi yuxululuq susuzlaşmadan xəbər verə bilər. Uşaq maye içə bilmirsə, davamlı qusursa və ya kəskin halsızdırsa, təcili tibbi yardım alınmalıdır”.
Terapevt qeyd edib ki, ilk mərhələdə əsas tədbir maye itkisinin bərpasıdır: “Bunun üçün oral rehidratasiya məhlullarını az miqdarda, tez-tez vermək tövsiyə olunur. Antibiotiklər rotavirusa təsir etmir və özbaşına istifadə edilməməlidir.
Yoluxmanın qarşısını almaq üçün əllərin sabunla yuyulması, tualetlərin və tez-tez toxunulan səthlərin təmizliyi vacibdir. Qusma və ishalı olan uşaqlar məktəbə göndərilməməlidir. Körpəlik dövründə aparılan rotavirus peyvəndi ağır xəstəlikdən qorunmanın ən təsirli üsuludur”.
Nuray Oqtayqızı
16:00 30.10.2026
Oxunuş sayı: 267
