Türk Dünyası
Türkiyə-Özbəkistan sazişi Türk dünyasını möhkəmləndirir – Azərbaycan tranzitdən gəlir qazanacaq!
Türkiyə və Özbəkistan arasında ticarət, sosial təminat və biznes sahələrində əməkdaşlığın genişləndirilməsini nəzərdə tutan 5 mühüm sazişin imzalanması iki ölkə arasında iqtisadi əlaqələri daha sistemli və strateji mərhələyə daşıyır. Türk Dövlətləri Təşkilatı (TDT) daxilində inteqrasiya proseslərinin sürətləndiyi bir vaxtda Ankara və Daşkənd arasında əldə olunan bu razılaşmalar təkcə iki ölkənin deyil, bütövlükdə Türk dünyasının iqtisadi-siyasi gücünü artırır. Azərbaycanın Zəngəzur dəhlizi və Xəzər tranzit marşrutu vasitəsilə bu ticarət dövriyyəsinin ana mərkəzində yer alması runsik strategiyanın ölkəmiz üçün yeni dividentlər gətirəcəyini göstərir.
Türkiyə-Özbəkistan sazişlərinin Türk birliyinə təsirini, iqtisadi fürsətləri və Azərbaycanın tranzit gəlirlərini Crossmedia.az-a professor Sabir Məmmədli şərh edib:
"Türk dövlətləri arasında istənilən razılaşma – istər ikitərəfli olsun, istərsə də çoxtərəfli – birmənalı olaraq Türk dünyasının, Türk birliyinin möhkəmlənməsinə və xalqlarımızın inteqrasiyasına xidmət edir. Bu mənada Türkiyə ilə Özbəkistan arasında imzalanmış razılaşmalar böyük əhəmiyyət kəsb edir və bu doğmalığı daha da dərinləşdirəcək. Özbəkistan 30 milyondan artıq əhalisi ilə çox geniş alıcılıq imkanlarına malik olan əlverişli bir bazardır. Ticarət və biznes sahəsində əməkdaşlığın gücləndirilməsi hər iki ölkə üçün investisiya qoyuluşu və gəlir əldə edilməsi baxımından geniş imkanlar yaradacaq. Gələcəkdə Özbəkistanın zəngin qaz yataqları, qiymətli metalları və mineralları Türkiyə iş adamları üçün böyük sahə açacaq".
Professor bu iqtisadi yaxınlaşmanın Azərbaycan üçün yaratdığı geostrateji üstünlükləri və Zəngəzur dəhlizinin rolunu diqqətə çatdırıb:
"İki ölkə arasında ticarət əlaqələrinin güclənməsi Azərbaycan üçün də çox böyük imkanlar yaradır. Azərbaycan tranzit ölkə kimi bu prosesdən mühüm gəlirlər əldə edəcək. Türkiyədən Özbəkistana, yaxud Özbəkistandan Türkiyəyə ixrac olunan məhsullar Türkmənistan, Qazaxıstan və Azərbaycandan keçəcək. Bu mənada "Türk yolu", Türk qapısı daha da güclənəcək. Zəngəzur dəhlizi açılandan sonra isə bu proses daha da əlverişli və sürətli olacaq. Düşünürəm ki, Türk dövlətləri arasında inteqrasiya prosesinin güclənməsini yalnız müsbət qarşılamaq və düzgün qiymətləndirmək lazımdır".
Zeynəb Həsən
18:30 30.10.2026
Oxunuş sayı: 62
