Bu gün Türkiyə tarixinin ən sirli və üstü hələ də tam açılmayan qətllərindən birinin üzərindən 33 il ötür.
Crossmedia.az xəbər verir ki, 1993-cü ilin bu günü Türkiyənin tanınmış araşdırmaçı-jurnalisti və yazıçısı Uğur Mumcu Ankarada yaşadığı binanın qarşısında avtomobilinə yerləşdirilən bombanın partlaması nəticəsində qətlə yetirilmişdi.
Uğur Mumcu cəsarətli jurnalist araşdırmaları ilə tanınırdı. O, yazılarında və kitablarında Mossad, CIA, Barzani ailəsi, kürd siyasi hərəkatları və kəşfiyyat strukturları arasındakı mümkün əlaqələrə xüsusi yer ayırırdı. Bu mövzularla bağlı mütəmadi köşə yazıları və geniş araşdırmalar dərc etmişdi.
Mumcunun sevdiyi əsərlərdən biri də Nazim Hikmətə həsr olunmuş “Yiğidim aslanım burda yatıyor” şeiri idi. Şeirə Zülfi Livanelinin bəstələdiyi musiqini xüsusi sevən Mumcu üçün keçirilən vida mərasimində iştirakçılar bu əsəri ifa edərək onu son mənzilə yola salmış, ifa sonradan “Uğur Mumcu ağısı” kimi yadda qalmışdı.
Daha sonra bu musiqi dünya şöhrətli pianoçu Fazil Say tərəfindən yenidən işlənərək səhnədə ifa olunmuş və Mumcunun xatirəsinə ithaf edilmişdi.
Uğur Mumcunun qətli illər keçməsinə baxmayaraq, Türkiyə cəmiyyətində hələ də cavabsız suallar və dərin izlər buraxmağa davam edir.
