Kürdlər üzərindən gərginlik artır: ABŞ Suriyaya qarşı sanksiya kartını masaya qoydu
ABŞ Suriyanın kürdlərin rəhbərlik etdiyi Suriya Demokratik Qüvvələrinə (SDQ) qarşı hərbi əməliyyatları genişləndirməsi halında Dəməşqə qarşı sanksiyaların yenidən tətbiq edilə biləcəyi ilə bağlı xəbərdarlıq edib.
Crossmedia.az bu barədə “The Wall Street Journal”-a istinadən xəbər verir.
Məlumata görə Vaşinqton Suriyanın daha genişmiqyaslı hücuma keçəcəyi təqdirdə, əvvəl ləğv edilmiş və ya yumşaldılmış sanksiyaların geri qaytarılmasını gündəmə gətirib. ABŞ rəsmiləri bu addımın bölgədə təhlükəsizliyi ciddi şəkildə təhdid edəcəyini bildiriblər.
Mənbələrə görə, ABŞ-nin Suriya üzrə xüsusi nümayəndəsi Tom Barrak və ABŞ Mərkəzi Komandanlığının komandanı general Bred Kuper hazırda həm Dəməşq, həm də SDQ tərəfi ilə gündəlik danışıqlar aparır. Məqsəd vəziyyətin daha da gərginləşməsinin qarşısını almaqdır.
Bundan əlavə, ABŞ-nin vitse-prezidenti Ceyms Vens Suriya prezidenti Əhməd əl-Şara ilə telefon danışığı apararaq, onu kürdlərlə yaranmış fikir ayrılıqlarını siyasi yollarla həll etməyə razı salmağa çalışıb.
ABŞ kəşfiyyatının qiymətləndirməsinə əsasən, Əl-Şara Türkiyə Silahlı Qüvvələrinin dəstəklədiyi qüvvələrlə birlikdə Fərat çayının şərqində SDQ-yə qarşı genişmiqyaslı hərbi əməliyyat planlaşdıra bilər. Belə bir ssenari döyüşlərin ABŞ qoşunlarının əsasən yerləşdiyi Suriyanın şimal-şərq bölgələrinə yayılması riskini artırır.
Vaşinqton bildirir ki, bu cür eskalasiya həm regional sabitliyə, həm də ABŞ hərbçilərinin təhlükəsizliyinə ciddi təhdid yarada bilər.
23:54 19.01.2026
Oxunuş sayı: 1236
