Filarmoniyada görkəmli dövlət xadimi Fətəli Xan Xoyskinin 150 illiyinə həsr olunmuş konsert keçirilib
M.Maqomayev adına Azərbaycan Dövlət Akademik Filarmoniyasının səhnəsində Azərbaycanın görkəmli siyasi və dövlət xadimi Fətəli Xan Xoyskinin 150 illiyinə həsr olunmuş konsert keçirilib.
Crossmedia.az Filarmoniyaya istinadən xəbər verir ki, musiqili gecədə İlahə Hüseynovanın dirijorluğu, Azərbaycan Dövlət Xalq Çalğı Alətləri Orkestri, F.Əmirov adına Əməkdar Kollektiv Azərbaycan Dövlət Mahnı və Rəqs Ansamblının Xorunun müşayiəti ilə solistlər - Əməkdar artistlər Almaz Orucova, Xəyyam Məmmədov (kamança) və Nurlana Abdullayeva, Nurlan Əzizbəyli, Rəvan Qaçayev, Fərid Əliyev, Rəvanə Qurbanova, Xatirə Kərimova (saz), Taleh Yəhyayev dinləyicilər qarşısında çıxış ediblər.
Konsertdə Üzeyir Hacıbəyli “Cəngi”, Polad Bülbüloğlu “Şən Azərbaycan” və “Eşq və Ölüm” baletindən “Döyüşçülərin rəqsi”, Emin Sabitoğlu “Dədə Qorqud” kinofilmindən mahnı, Azərbaycan xalq mahnısı “Ay Laçın”, Əlibaba Məmmədov “Xudayar təsnifi”, Niyazi “Vətən nəğməsi”, Dadaş Dadaşov “Gözəldir” və digər Azərbaycan bəstəkarlarının əsərləri səsləndirilib.
Konsertdə səslənən hər bir musiqi parçası, bir tərəfdən sənətə, digər tərəfdən isə dahi şəxsiyyət Fətəli Xan Xoyskinin xatirəsinə ehtiramın səsi olub.
15:09 11.12.2025
Oxunuş sayı: 1194
