Ümumdünya Kosmos Həftəsinə həsr olunmuş elmi sessiya keçirilib
Elm və Təhsil Nazirliyi N.Tusi adına Şamaxı Astrofizika Rəsədxanasının təşkilatçılığı ilə Tusi-Bohm Planetariumda Ümumdünya Kosmos Həftəsinə və Beynəlxalq Astronomiya İttifaqının “100 saat Astronomiya” təşəbbüsünə həsr olunmuş “Gənc alimlərin elmi sessiyası: Kosmos və Yer elmləri” adlı tədbir keçirilib.
Tədbirdə N.Tusi adına Şamaxı Astrofizika Rəsədxanasının və H.Əliyev adına Coğrafiya İnstitutunun Gənc Alim və Mütəxəssislər Şurasının (GAMŞ) üzvləri iştirak ediblər.
Crossmedia.az xəbər verir ki, bu barədə rəsədxanadan məlumat verilib.
Tədbirin açılışında Planetariumun direktoru Famil Mustafa elmin populyarlaşdırılması istiqamətində əməkdaşlığa hər zaman açıq olduqlarını vurğulayıb.
Daha sonra Şamaxı Astrofizika Rəsədxanasının rəhbərliyi adından çıxış edən, rəsədxananın informasiya təminatı və ictimaiyyətlə əlaqələr şöbəsinin müdiri Orxan Salehli tədbirin elmi əməkdaşlıq və bilik mübadiləsi baxımından əhəmiyyətindən danışıb. O qeyd edib ki, bu kimi görüşlər elmlər arasında inteqrasiyanı və gənc tədqiqatçıların elmi fəaliyyətə marağını daha da artırır.
Sonra Coğrafiya İnstitutunun elmi katibi dosent Səidə Zeynalova çıxış edərək bu elmi sessiyanın gənc alimlər üçün yeni tədqiqat üfüqləri açacağına inandığını bildirib.
Elmi sessiyada “Kosmosdan yerə baxış: iqlim dəyişikliklərinin vizual sübutları”, “Peyk və peykaltı təsvirlərin kosmik monitorinqi”, “Kosmik məlumatlar əsasında Abşeron yarımadası sahil zonasında külək rejimi və enerji potensialının tədqiqi”, “Kosmosun kəşfi: Tarixi missiyalar və yeni perspektivlər” mövzularında məruzələr dinlənilib.
Sonda “Kainata doğru” adlı sənədli film nümayiş etdirilib.
17:00 08.10.2025
Oxunuş sayı: 3952
