Azərbaycanın xarici investisiyalar üçün böyük imkanları yaranacaq- RƏY
Azərbaycan Prezidenti İlham Əliyev BMT Baş Assambleyasının 80-ci sessiyasındakı çıxışı zamanı bildirib ki, bu yaxınlarda iki aparıcı beynəlxalq reytinq agentliyi ("Moody"s" və "Fitch") Azərbaycanın reytinqini artırıb.
Dövlətimizin başçısı vurğulayıb ki, bu, ölkəmizdə iqtisadi dayanıqlılığın, güclü fiskal intizamın və əlverişli investisiya mühitinin səviyyəsini təsdiq edir. Xarici borcumuz ÜDM-in cəmi 6,5 faizini təşkil edir ki, bu da dünyada ən aşağı göstəricilərdən biridir. Azərbaycanın valyuta ehtiyatları xarici borcumuzdan təxminən 16 dəfə artıqdır.
Məsələ ilə bağlı Crossmedia.az-a açıqlama verən Milli Məclisin IV çağırış deputatı (III, IV, V,VI), iqtisad elmləri doktoru, professor Rüfət Quliyev belə mötəbər beynəlxalq qurumların, reytinqlərin fikri və qərarı çox önəmli olduğunu qeyd edib: "Bu, bütün ölkələrə, bütün iqtisadiyyatlara, bütün aparıcı şirkətlərə bir məlumatdır ki, bu ölkədə gedən proseslər kifayət qədər müsbətdir. Burada həm siyasi stabillik, inkişaf, ümumdaxili məhsulun artımı, valyutanın stabilliyi və bir çox digər məqamlar nəzərə alınır. Bu, ən azı 35–40 kriteriyaya söykənən reytinqlərdir. Bu, göstərir ki, Prezident dediyi kimi sözügedən məqam onun üçün önəmlidir. Yəni, bu tək bizim üçün deyil, indiki tərəfdaşlar üçün də vacibdir. Azərbaycanla iş görmək istəyən yüzlərlə şirkət var. Həmçinin Azərbaycanın ümumdaxili məhsulundan çox böyük dövriyyəyə malik şirkətlər də var. Qeyd edim ki, ümumdaxili məhsula nisbətdə borcumuz cəmi 6,5%-dir. Ümumdaxili məhsuldan artıq qızıl və valyuta ehtiyatlarımız var. Ümumdaxili məhsulun hər il artımı ən azı 2,5–3,5%-dir. Bu, çox bariz bir göstəricidir; iqtisadiyyat inkişaf edir və fiskal sistemin pozitiv nəticələri açıq-aydın görünür”.
Professor qeyd edib ki, büdcəyə ödəmələr ilbəil artır: “Bu da göstərir ki, iqtisadiyyatın özündə kifayət qədər rezervləri və əlavə mənbələri var. Azərbaycanın iqtisadiyyatı dayanıqlı inkişaf edən iqtisadiyyatdır. İran, Rusiya ciddi sanksiyalar altındadır. Türkiyədə şiddətli inflasiya və devalvasiya gedir, Gürcüstanda qərblə siyasi və iqtisadi çəkişmələr mövcuddur.Qərb Gürcüstanın müstəqil siyasətini bəyənmir. Beləliklə, Azərbaycan regionda yeganə stabil ölkədir. Təbii ki, bütün beynəlxalq maliyyə qurumları yüksək reytinqlər verirlər və bu, gələcəkdə Azərbaycanın xarici investisiyalar üçün böyük imkanlar yaradacaq".
Professor, həmçinin daha bir maraqlı məqama toxunub: “Biz öz torpaqlarımızı azad elədikdən sonra son illərdə, əsasən, 22 milyard manatdan artıq büdcə vəsaitini həmin torpaqlarda iqtisadiyyatın fundamentini qurmağa sərf etdik. Bu il də 4 milyard manatdan çox vəsait ayrılıb. Son yüz ilin tarixində heç bir dövlət belə qısa zamanda həm torpaqlarının qaytarılmasını təmin etməyib, həm də orada iqtisadi güclü bir bazanın əsaslarını qurmayıb. Bizim infrastruktur qurumlarımız – Azərişıq, Azəenerji və Azəriqaz – sürətlə işlər gördü və tamamilə infrastruktur baxımından nöqtəsi də olmayan ərazilərdə təxminən iki ayın içində bütün problemlərin həllini təmin etdilər.
Bir misal da gətirim: 37 günün içində Azərişıq həmin iki bölgəyə – Qarabağ və Zəngəzur bölgələrinə – kabellər çəkdi- meşələrin içindən, dağların qıraqları ilə. Yəni təsəvvür edin ki, orada 24 saat, gecə-gündüz iş getdi və misli görünməyən nəticə ortaya qoyuldu. Bütün dünya bilməlidir”.
Elmir Heydərli
18:54 26.09.2025
Oxunuş sayı: 5531
