İqtisadi xəbərlər
Eyni dərman apteklərdə nə üçün fərqli qiymətlərə satılır - Nazirlikdən açıqlama
Bəzən dərman pereparatlarının qiymətləri müxtəlif əczaxanalarda fərqli qiymətlərə satılır. Maraqlıdır ki, eyni dərman necə ola bilir ki, bir neçə fərqli satış müəssisəsində başqa qiymətlərə satılır. Bu vətəndaşlara bir neçə məsələdə çətinlik və çaşqınlıq yaradır.
Mövzu ilə bağlı İqtisadiyyat Nazirliyi Crossmedia.az-ın sorğusuna cavab olaraq bildirib ki, ölkəmizdə dərman vasitələrinin qiymətləri Nazirlər Kabinetinin təsdiq etdiyi müvafiq Qaydaya və Tarif (qiymət) Şurasının qiymətlərin hesablanmasına dair Təlimatına əsasən tənzimlənir: "Bu zaman dərman vasitələrinin topdan və pərakəndə satış qiymətlərinin yuxarı həddi müəyyən edilir. Apteklər dərmanları təsdiqlənmiş həddən aşağı qiymətə sata bilərlər. Buna görə də eyni dərman vasitəsinin müxtəlif apteklərdə satış qiyməti fərqlənə bilər. Müəyyən edilmiş yuxarı həddən baha satışa görə isə İnzibati Xətalar Məcəlləsində məsuliyyət nəzərdə tutulur. Məsələn, hər hansı bir dərman vasitəsinin qiymətinin yuxarı həddi 5 manat məbləğində təsdiqlənibsə, həmin dərman vasitəsinin maksimum qiyməti 5 manat ola bilər və o, 5 manatdan da aşağı qiymətə satıla bilər".
Məlumatda qeyd olunub ki, qiymətlərin hesablanmasında xarici referans qiymət yanaşması tətbiq olunur, yəni istinad ölkələrinin rəsmi və açıq mənbələrindəki qiymətlər əsas götürülür: "Müəyyən edilmiş bazis qiymət əsasında topdansatış və aptek təşkilatları üçün nəzərdə tutulan əlavələr, nəzarət markasının qiyməti və ƏDV nəzərə alınmaqla satış qiymətlərinin yuxarı həddi hesablanır. Qiymətlərin tənzimlənməsi ilə bağlı normativ hüquqi sənədlər və istinad mənbələri ilə Tarif Şurasının rəsmi internet səhifəsində tanış olmaq mümkündür. Eyni tərkibli, lakin müxtəlif istehsalçılara məxsus dərman vasitələrinin qiymətləri də fərqlənə bilər. Qiymət tənzimlənməsi zamanı istehsal ölkələrinin aid olduğu qruplar, həmin ölkələrdə dərman istehsalına tətbiq edilən tələblər, əczaçılıq sənayesinin inkişafı və istinad bazarlarındakı qiymətlər nəzərə alınır. Həmçinin apteklərdə satılan bioloji aktiv qida məhsulları dərman vasitəsi hesab edilmir və onların qiymətləri dövlət tərəfindən tənzimlənmir. Bu səbəbdən həmin məhsulların qiymətləri apteklər üzrə fərqlənə bilər.
16:01 28.10.2026
Oxunuş sayı: 440
