Ukraynanın Oleşki şəhərində atəşkəs: Dörd ildən sonra ilk sakitlik
Ukraynanın Rusiya nəzarətində olan Oleşki şəhərində təxminən 2 min mülki şəxsin təxliyəsi məqsədilə tətbiq edilən müvəqqəti atəşkəsə tərəflərin riayət etdiyi bildirilir.
Crossmedia.az xəbər verir ki, “The Guardian” qəzeti bu barədə məlumat yayıb.
Nəşrin məlumatına görə, oktyabrın 27-də yerli vaxtla saat 03:00-da başlayan atəşkəs çərçivəsində tərəflər pilotsuz uçuş aparatları ilə hücumları dayandırıblar.
Xerson şəhərindən təxminən 5 kilometr məsafədə, Dnepr çayının qarşı sahilində yerləşən Oleşkidə sakinlər son dörd ildə ilk dəfə cəbhə xəttində sakitlik müşahidə olunduğunu bildiriblər.
Ukrayna rəsmilərinin sözlərinə görə, müvəqqəti atəşkəsin noyabrın 1-i saat 23:00-dək davam etməsi nəzərdə tutulur.
Məlumata əsasən, şəhərdə 1500–2000 mülki şəxs ağır humanitar şəraitdə yaşayır. Ərzaq çatışmazlığı və hərəkət məhdudiyyətləri səbəbindən onların təxliyəsi zəruri hesab olunur.
ABŞ-nin birinci xanımı Melaniya Tramp humanitar missiyanın həyata keçirilməsi təşəbbüsü ilə çıxış edib. O, sosial şəbəkədə bildirib ki, təxliyə və yardımın çatdırılması üçün əməliyyatın başlanması iki gün əvvələ çəkilib.
Bu arada Finlandiya Prezidenti Aleksandr Stubb və Norveçin Baş naziri Yonas Qar Störe Rusiya Prezidenti Vladimir Putinlə telefon danışığı aparıblar.
Avropa liderləri söhbəti açıq və məzmunlu adlandırsalar da, tərəflər arasında ciddi fikir ayrılıqlarının qaldığını bildiriblər.
Danışığın noyabrda Əbu-Dabidə keçirilməsi gözlənilən Rusiya, Ukrayna və ABŞ nümayəndələrinin görüşü ilə əlaqəli olduğu qeyd edilir.
Bununla yanaşı, Oleşkidəki atəşkəs Ukraynanın digər ərazilərinə şamil edilmir.
“The Guardian” yazır ki, Rusiya qüvvələrinin Kiyevə gecə saatlarında endirdiyi raket və dron zərbələri nəticəsində azı bir nəfər ölüb, 15 nəfər yaralanıb. Hücumlar zamanı universitet şəhərciyinə, körpüyə və metro infrastrukturuna da ziyan dəyib.
Ukrayna Prezidenti Volodimir Zelenski Rusiyanı müharibəni uzatmamağa çağırıb və Avropa liderlərinin sülh istiqamətindəki təşəbbüslərini alqışlayıb.
15:47 28.10.2026
Oxunuş sayı: 60
