"Kadırovun izi- tozu da yoxdur, o..." - Sensasional açıqlama
Çeçenistan rəhbəri Ramzan Kadırov bildirib ki, hazırkı şəraitdə hərbi əməliyyatların dayandırılması məqsədəuyğun deyil və sülh yalnız Ukrayna Rusiyanın müəyyən regionu və ya dairəsini tanıyarsa mümkün ola bilər.
Kadırovun açıqlaması Rusiyanın mövqeyini daha sərt göstərir və sülh prosesinin çətinliyini vurğulayır. Bu yanaşma həm də hərbi əməliyyatların uzanmasının mümkünlüyünü göstərir. Həm Ukrayna, həm də beynəlxalq tərəflər üçün danışıqların mürəkkəbləşdiyini demək olar.
Hərbi ekspert Telman Qasımov Kadırovun səsləndirdiyi fikirlər barədə Crossmedia.az-a açıqlama verib: "Kadırovu danışdıran qüvvələr var. Ümumiyyətlə, Kadırovun savaşla bağlı mövqeyi artıq ilk gündən bəlli idi. Ondan başqa nə mövqe gözləmək olar ki? O, ayağından başına qədər qan içində olan, bütün cinayətlərə bulaşmış, xüsusən də Ukrayna cəbhəsində o acizliyi və özünü göstərməyi ilə iz qoymuş bir adamdır. Bu gün Kadırov kimilərin belə müharibənin bitməsi üçün sülhdən danışması, təbii ki, inandırıcı görünmür. Niyə inandırıcı deyil? Çünki müharibə bitərsə, artıq çox məsələlər üzə çıxacaq. Bir çox cinayət ifşa olunacaq. Məsələn, artıq Beynəlxalq Məhkəmələr işə qarışacaq. Yəni bu cinayətlərdə əli olanların siyasi təklənməsi gündəmə gələcək. Bax, bu siyahıda adı olanlardan biri də Kadırovun özüdür. Onun kimi adamlar üçün müharibənin uzanması daha lazımdır. Bu baxımdan qaniçən, cinayətkar, diktator, totalitar bir rejim qurmuş, ailə rejimi yaratmış bir adam sülhdən danışa bilməz. Kadırov kimdir ki, sülhə dəyər versin, qiymət versin, qərar versin? Bu sülhün olub-olmaması və müharibənin taleyini təbii ki, dünyanın böyük gücləri həll edəcək. Kadırovun burada izi-tozu da yoxdur. Ona görə də ilk növbədə Ukraynanın hansı bölgələri geri qaytaracağını müəyyənləşdirmək lazımdır".
O bildirib ki, Kadırovun açıqlamaları reallığa uyğun deyil: "Ümumiyyətlə, o, ciddi adam sayılmır. Dünya siyasətində çəkisi olmayan bir adamdır. Yenə deyirəm: diktator, qan içən, terrorçu və hansı məzhəbə qulluq etdiyini də özü bilməyən biridir".
Ekspert əlavə edib ki, müharibənin yaxın vaxtda bitəcəyinə dair heç bir işarə yoxdur: "Bu baxımdan hesab edirəm ki, Kadırov özbaşına danışmır. Onu danışdıran qüvvələr var. Onun özü savadsız adamdır. Onu danışdırırlar və ümumi ölkədəki, dünyadakı reaksiyanı gözləyirlər. Bununla da reaksiyaya uyğun nəticələr çıxarırlar. Kadırovun verdiyi açıqlamalar qeyri-ciddi, əsassız və gülüş doğuran yazılardır”.
Nicat Rüstəmzadə
12:53 09.09.2025
Oxunuş sayı: 6278
