"Azərbaycanla Türkiyə arasında enerji əməkdaşlığının genişləndirilməsi üçün kifayət qədər imkan var" -Professor
Dünya iqtisadiyyatı və Azərbaycan( Layihənin müəllifi Rüfət Quliyevdir)
Azərbaycan və Türkiyə regionun əsas simaları olmaqla yanaşı həm də bir çox beynəlxalq layihələrə ev sahibliyi edən dövlətlərdir. Dövlətlərimiz arasında bir çox sahədə əldə edilən əməkdaşlıq və razılaşmalar hər iki tərəfə yeni iqtisadi inkişaf perspektivləri yaradır. Xüsusən enerji əməkdaşlığı sahəsində əldə edilən uğurlar və artan gəlirlər tərəflərin düzgün və etibarlı strategiyasından xəbər verir. Azərbaycan energetika naziri Pərviz Şahbazov da “Azərbaycan-Türkiyə IV Enerji Forumu”da qeyd edib ki, Azərbaycan-Türkiyə enerji əməkdaşlığı yeni bazarlara çıxışı təmin edir.
Mövzu ilə bağlı Milli Məclisin 4 çağırış deputatı (III, IV, V, VI) iqtisad elmləri doktoru professor Rüfət Quliyev Crossmedia.az-a açıqlama verib:
“Təbii ki, qaz boruları və bütün avadanlıqlar 10-15 illik istismar üçün nəzərdə tutulmayıb. Onlar onillərlə müddət istismar olunacaq. Bu da onu göstərir ki, Azərbaycan tək öz qazını yox, qonşu ölkələrin qazını da tranzit kimi öz şəbəkələrindən keçirə biləcək. Bu, bizim üçün daha maraqlıdır. Çünki burdan əldə edilən nəqliyyat pulu qeyri-neft qazancına aid olur. Bu da gələcəkdə Azərbaycan üçün kifayət qədər ciddi divident vəd edir. Qeyd edim ki, gələcək illərdə bu rəqəm qat-qat artacaq. Türkmənistan qaz yataqlarına görə dünyada ilk beşlikdədir. Və onların əsas nəqliyyatı yalnız Çinlə bağlıdır. Rusiya ilə də müəyyən əlaqələri var, amma bu o qədər də güclü deyil. Artıq Azərbaycanla siyasi razılaşmada əldə olunub. Razılaşma belədir ki, Xəzər dənizinin dibi ilə yeni infrastruktur yaransın və Türkmənistan qazı Azərbaycan şəbəkələri ilə, xüsusilə Türkiyə vasitəsilə xaricə yollansın. Təbii ki, gələcəkdə sanksiyalar aradan qalxsa, Rusiya və İranın da bu məsələdə ciddi maraqları var. Ümumilikdə biz sözügedən məsələyə optimist baxırıq və baxmalıyıq. Bir məqamı da qeyd edim ki, qardaş Türkiyə ilə bizim bir çox həyata keçirilmiş layilərimiz var ki, bu da ən nəhənglərdən biridir. Gələcəkdə də bunun inkişafı, şaxələndirilməsi üçün həm Azərbaycan, həm də Türkiyədə kifayət qədər imkan var”.
Ayhan
16:38 05.09.2025
Oxunuş sayı: 4894
