Azərbaycan Prezidenti İlham Əliyev Pekində Qələbə Paradında iştirak edəcək
Azərbaycan Prezidenti İlham Əliyev Çin xalqının yapon işğalçılarına qarşı Müqavimət müharibəsində və İkinci Dünya Müharibəsində qələbənin 80 illiyinə həsr olunmuş təntənəli tədbirlərdə iştirak edəcək. Bu barədə Çin Mərkəzi Televiziyası məlumat yayıb.
Crossmedia.az xarici KİV-ə istinadən xəbər verir ki, tədbir 3 sentyabr tarixində Pekinin Tyananmen meydanında baş tutacaq və burada möhtəşəm hərbi parad keçiriləcək. Tədbirdə Ermənistanın Baş naziri Nikol Paşinyan, KXDR lideri Kim Çen In, İran Prezidenti Məsud Pəzeşkiyan, Pakistanın Baş naziri Şahbaz Şərif və Kremlin rəhbəri də daxil olmaqla 26 xarici ölkə liderinin iştirakı gözlənilir.
Bu tədbir Çinlə Avrasiya ölkələri arasında möhkəmlənən beynəlxalq əməkdaşlığın bariz nümunəsi kimi diqqət çəkir. Prezident İlham Əliyevin paradda iştirakı Azərbaycan-Çin münasibətlərinin əhəmiyyətini və iki ölkə arasında siyasi dialoqun yüksək səviyyədə olduğunu nümayiş etdirir.
Səfər çərçivəsində Prezident İlham Əliyevin Çin Xalq Respublikasının rəhbərliyi və digər iştirakçı ölkələrin liderləri ilə ikitərəfli görüşləri də gözlənilir.
Səbiyyə Zayirova
09:29 28.08.2025
Oxunuş sayı: 5148
