Bizim əsas vəzifəmiz bu dəyərləri qoruyub gələcək nəsillərə çatdırmaqdır – Deputat
"Azərbaycan şiə və sünni müsəlmanların eyni vaxtda eyni məsciddə ibadət etdikləri az sayda ölkələrdən biridir. Biz fərq qoymuruq". Bu sözləri Azərbaycan Prezidenti İlham Əliyev "Əl-Ərəbiyyə" kanalına müsahibəsində deyib.
"Biz düşünürük ki, müsəlman dünyası üçün ən böyük təhlükə təriqətlərə ayrılmaqdır, - deyən dövlətimizin başçısı bildirib ki, müsəlman dünyasına ən böyük ziyanı təriqət ayrılığını təbliğ edən insanlar vururlar. - Biz bir olmalıyıq. Biz müsəlmanıq və bizim üçün bir nömrəli məsələ budur".
Həqiqətəndə ölkəmiz bu şiə və sünni müsəlmanların eyni vaxtda eyni məsciddə ibadət etdikləri az saylı ölkələrdən biridir. Təbii ki, bu ölkə başçısının yürütdüyü düzgün siyasətdən qaynaqlanır. Bəs ölkəmizdən fərqli olaraq digər ölkələrdə bu ayrıseçkilik nədən qaynaqlanır?
Məsələ ilə bağlı Crossmedia.az-a açıqlama verən Milli Məclisin deputatı, ilahiyyat üzrə fəlsəfə doktoru Ceyhun Məmmədov müsəlman dünyasının bir parçası olaraq qazandığımız ən mühüm nailiyyətlərdən birinin ölkəmizdə tolerantlıq və həmrəylik mühitinin yaradılması olduğunu qeyd edib: “Ümumiyyətlə, Azərbaycanın tarixən əldə etdiyi bu uğur olduqca böyük nailiyyətdir. Bizim müsəlman dünyasının bir parçası olaraq qazandığımız ən mühüm nailiyyətlərdən biri ölkəmizdə tolerantlıq və həmrəylik mühitinin yaradılmasıdır. Əslində, zaman-zaman bu sahədə ciddi təhdidlər və təhlükələrlə də üzləşmişik. Lakin artıq Azərbaycanda bu ənənələr güclü şəkildə formalaşmışdır. Deyə bilərik ki, ölkəmizdə bu ənənələr dərin köklərə malikdir və onların möhkəm əsasları vardır. Bu isə dövlətimizin həyata keçirdiyi məqsədyönlü siyasətin böyük uğurlarından biridir.
Bu gün qarşımızda duran əsas vəzifələrdən biri də məhz bu nailiyyətin qorunmasıdır. Bir çox ölkələrin bu istiqamətdə uğur qazana bilməməsi, onların qarşılaşdığı problemlərin kökləri məsələsinə gəldikdə isə, düşünürəm ki, bunun başlıca səbəbi həmin ölkələrin milli və dini ənənələrini, xüsusilə də məzhəblərarası münasibətləri düzgün tənzimləyə bilməməsidir. Bu səbəbdən həmin ölkələrdə məzhəbçilik və qarşıdurmalar geniş yayılmışdır və görünür ki, bu problemlər gələcəkdə də davam edəcəkdir”.
Deputat həmçinin hazırda bu ənənələrin pozulmasına yönəlmiş ciddi cəhdlərin olduğunu və cəmiyyətimizin əsas vəzifə olaraq bu dəyərləri qoruyub saxlamaq olduğunu bildirib.
“Azərbaycan isə artıq bu sahədə öz ənənələrini formalaşdıraraq mühüm uğurlar əldə etmişdir. Bizim əsas vəzifəmiz bu dəyərləri qoruyub gələcək nəsillərə çatdırmaqdır. Çünki bu ənənələrin pozulmasına yönəlmiş ciddi-cəhdlər mövcuddur və biz bütün bunları nəzərə alaraq ölkəmizdə milli həmrəylik və tolerantlıq ənənələrini daha da gücləndirməliyik.
Əminik ki, Azərbaycan bu istiqamətdə də uğurlar qazanacaq və əldə etdiyi dəyərləri qorumağa nail olacaqdır. Çünki bu sahədə görüləsi işlər hələ də çoxdur, digər ölkələr isə hələ də bu çətinliklərin öhdəsindən gələ bilmirlər və buna görə də bu problemləri yaşamaqda davam edirlər”- deyə deputat qeyd edib.
Elmir Heydərli
17:05 27.08.2025
Oxunuş sayı: 921
