"Prezidentin İlham Əliyevin “Əl-Ərəbiyyə” müsahibəsinin efirində səsləndirdiyi fikirlər maraqla qarşılanır" - RƏY
Ölkə başçısı İlham Əliyev Səudiyyə Ərəbistanının “Əl-Ərəbiyyə” telekanalına müsahibə verib. Müsahibədə Prezident bir çox məsələlərə toxunmuş və Azərbaycanın bir daha beynəlxalq dəyərlərə önəm verdiyini qeyd edib.
Türk Dövlət Təşkilatının (TDT) qlobal siyasətdə tutduğu yeri və roluna toxunan dövlət başçımız bu təşkilata daxil olan ölkələrin eyni etnik köklərə malik olması və ölkələr arasında ikitərəfli dostluq əlaqələrinin mövcud beynəlxalq təşkilatlarda nadir hal olduğunu bildirib. Ölkəmizin Türk dövlətlərinin inkişafında aktivliyi isə, təbii ki, danılmazdır.
Məsələ ilə bağlı Crossmedia.az-a açıqlama verən Milli Məclisin deputatı Azər Badamov TDT-nin qlobal rolu və digər məsələlər ətrafında cavablandırılan sualların çox diplomatik olmaqla yanaşı, beynəlxalq tərəfdaşlar tərəfindən də maraqla gözlənildiyini qeyd edib: "Avqustun 26-da Prezident İlham Əliyevin “Əl-Ərəbiyyə” kanalına verdiyi geniş müsahibəsi yayımlandı. Dövlət başçımız müsahibədə regional və qlobal xarakterli bir çox məsələlərə münasibət bildirərək baxışlarımızı geniş izləyici auditoriyasına çatdırdı. Müsahibədə verilən suallar və cavablar çoxşaxəlidir. Bu, Azərbaycanın regionda sülh və əməkdaşlığı təşviq edən sabitləşdirici aktor olduğunu bir daha təsdiq edir. Dövlət başçımız torpaqlarımızın işğal olunmasından bu günə qədər regionda mövcud olmuş vəziyyət və 2020-ci ildə qələbəmizlə yaratdığımız yeni reallığın verdiyi qlobal əməkdaşlığa töhfələr haqqında fikirlərini ifadə etdi. Həmçinin Ermənistanla paraflanmış sülh müqaviləsinin dönməzliyi, Azərbaycan–ABŞ münasibətləri, İsrail–Suriya və İsrail–Türkiyə gərginliyinin azaldılmasında verdiyimiz töhfələr, ATƏT-in Minsk qrupunun hüquqi ləğvi, Zəngəzur dəhlizi, TDT-nin qlobal rolu və digər məsələlər ətrafında verilən cavablar həm diplomatik, həm də beynəlxalq tərəfdaşlar tərəfindən maraqla qarşılanır. Trampın adını daşıyacaq Zəngəzur dəhlizinin əhəmiyyətinə toxunan dövlət başçımız Naxçıvanın Azərbaycanın əsas hissəsindən ayrı düşməsinin səbəblərindən başlayaraq bu gün yenidən quru yolla birləşməyimiz istiqamətində görülən işlərə qədər baş verən proseslərə geniş nəzər saldı. Bu dəhlizin açılışı nəinki Naxçıvanla təhlükəsiz keçidimizi təmin edəcək, həm də Ermənistanı tranzit ölkəyə çevirməklə Şimal–Cənub və Şərq–Qərb nəqliyyat dəhlizlərinin coğrafiyasını genişləndirəcək. TDT-nin qlobal siyasətdə tutduğu yeri və roluna toxunan dövlət başçımız bu təşkilata daxil olan ölkələrin eyni etnik köklərə malik olması və ölkələr arasında ikitərəfli dostluq əlaqələrinin mövcud beynəlxalq təşkilatlarda nadir hal olduğunu bildirdi. Həmçinin konkret layihələr, investisiyalar, enerji, nəqliyyat və mədəniyyət layihələri vasitəsilə TDT-ni möhkəmləndirməli olduğumuzu vurğuladı”.
“Sonda qeyd etmək istəyirəm ki, dövlət başçımızın müsahibəsini dinləyən hər bir şəxs, onun siyasətçi, dövlət başçısı və ya sadə bir vətəndaş olmasından asılı olmayaraq Azərbaycanın sülh və əməkdaşlıq əsasında münasibətlər quran ədalətli bir ölkə olması barədə geniş məlumata malik olur. Həmçinin dövlət başçımızın bu müsahibəsi Azərbaycan ətrafında qərəzli dezinformasiya yaymağa çalışanlara və yaratdığımız yeni reallığa şübhə ilə yanaşanlara verilən çox ədalətli və ən düzgün cavab oldu” , - o əlavə edib.
Elmir Heydərli
16:52 27.08.2025
Oxunuş sayı: 15586
