Azərbaycanla ABŞ arasında iqtisadi sahədə əməkdaşlıq inkişaf etməkdədir -RƏY
İqtisadiyyat naziri Mikayıl Cabbarov bildirib ki, Azərbaycan və ABŞ arasında ticarət əlaqələri sürətlə inkişaf edir və 2024-cü ildə ticarət dövriyyəsi 1,7 milyard ABŞ dollarına çatıb. O qeyd edib ki, ABŞ şirkətləri ölkədə kənd təsərrüfatı, sənaye və digər sahələrdə aktiv fəaliyyət göstərir.
Azərbaycan və ABŞ arasında ticarət əməkdaşlığı son illərdə sürətlə artaraq iki ölkə üçün qarşılıqlı faydalı imkanlar yaradır. Bu artım həm ölkənin iqtisadi potensialını göstərir, həm də ABŞ şirkətləri üçün Azərbaycanın investisiya cəlbediciliyini təsdiqləyir.
İqtisadçı- ekspert Fuad İbrahimov ikitərəfli əlaqələrin mövcud durumu barədə Crossmedia.az-a açıqlama verib.
O, ABŞ ilə istər siyasi müstəvidə, istər iqtisadi münasibətlərdə əməkdaşlığı inkişaf etdirməyin sevindirici hal olduğunu bildirib: “Ümumiyyətlə, ABŞ kimi dünya iqtisadiyyatının flaqmanı olan bir dövlətlə istənilən əməkdaşlıq hər bir ölkənin prioritet məqsədlərindən biridir. Fərqi yoxdur hansı sahədə. Əlbəttə ki, ticarət də bineyiqədimdən dövlətlər arasında ilk əməkdaşlığı əhatə edən bir varlıqdır. Ticarətin artması birmənalı şəkildə Azərbaycan kimi dövlətə onun ciddi partnyor olması kimi səciyyəvidir. Digər tərəfdən də ümumiyyətlə ABŞ investisiyaları, o ölkənin iştirakı ilə, əsasən də kənd təsərrüfatı, sənaye sektorlarında hər hansısa bir irəliləyiş artıq o sektorun dayanıqlı formada fəaliyyətinin göstəricisi kimi qəbul olunur. Beynəlxalq sorğu indekslərində öz əsasını tapmış bir məlumat olur. Bu, çox ciddi məsələdir. Bu, çox sevindirici haldır ki, ABŞ ilə istər siyasi müstəvidə, istər iqtisadi münasibətlərdə əməkdaşlıq inkişaf etməkdədir. İqtisadiyyat naziri Mikayıl Cabbarovun da qeyd etdiyi kimi, rəqəmlərin əsasında danışırıqsa, əgər artım varsa, bu birmənalı şəkildə Azərbaycanın yüksəlişi istiqamətində atılan addımların əsasıdır. Hesab edirəm ki, bu fəaliyyət, bu göstəricilər genişlənməlidir. ABŞ həm kənd təsərrüfatı sektorunda, həm də sənaye sektorunda kifayət qədər təcrübəli, transmilli şirkətlərin fəaliyyətdə olması ilə seçilən və bu sahədə bütün dünyanı əhatə etdiyini göstərən göstəriciyə malik dövlətdir. ABŞ ilə hər bir istiqamətdə (iqtisadi, sənaye, siyasi, hətta şaxələndirilmiş ticarət sahələrində) əməkdaşlıq Azərbaycan üçün müsbət xarakter daşıyır. Qısa zaman ərzində bu nailiyyətlərin, mənfəətin, faktların və statistik məlumatların Azərbaycana nə dərəcədə müsbət təsir etdiyini görmək mümkün olacaq”.
Nicat Rüstəmzadə
16:31 27.08.2025
Oxunuş sayı: 1028
