Ermənistan konstitusiyasında ərazi iddialarına dair müddəa ləğv olunarsa, sülh sazişi imzalanacaq – Deputat
Azərbaycan Respublikasının Prezidenti İlham Əliyev Səudiyyə Ərəbistanının “Əl-Ərəbiyyə” telekanalına müsahibəsində Ermənistanla formal sülh sazişinin imzalanmasının əsas şərtini açıqlayıb. Dövlət başçısı qeyd edib ki, danışıqlar bir neçə il davam edib və nəhayət, ABŞ-ın paytaxtı Vaşinqtonda Prezident Donald Tramp və onun komandasının böyük dəstəyi ilə yekunlaşıb. Prezident vurğulayıb ki, formal sülh sazişinin hələ imzalanmamasının əsas səbəbi Ermənistan Konstitusiyasında Azərbaycanın ərazi bütövlüyünü şübhə altına alan müddəanın mövcudluğudur: "Bildiyimiz qədər, onlar həmin müddəaya dəyişiklik edəcəklər. Əgər Azərbaycanın ərazi bütövlüyünə qarşı iddialar Ermənistan Konstitusiyasından çıxarılarsa, formal sülh sazişi də imzalanacaq."
Maraqlıdır, Ermənistan sülh naminə və Azərbaycanla əlaqələrin bərpası üçün Konstitusiyasında dəyişiklik edəcəkmi?
Məsələ ilə bağlı Milli Məclisin deputatı Aydın Mirzəzadə Crossmedia.az-a açıqlamasında bildirib ki, Ermənistan regionda təcriddən çıxmaq və Azərbaycanla sərhədlərin açılmasına nail olmaq istəyirsə, Konstitusiyasında yer alan ərazi iddialarından imtina etməlidir: "Əgər Ermənistan Azərbaycanla sərhədlərin açılmasını və özü-özünü saldığı izolyasiyadan çıxmağı istəyirsə, Konstitusiyasında qeyd olunan müddəalardan əl çəkməlidir. Bu məsələ yalnız bəyanatlarla həll olunmur, dövlətin əsas qanunu olan Konstitusiyada Azərbaycanın bir hissəsinin Ermənistan ərazisi olduğu barədə müddəa var və bu, mütləq dəyişdirilməlidir. Dünyada heç bir ölkə qonşusuna qarşı ərazi iddiası irəli sürən dövlətlə normal münasibət saxlamaz. Nəzərə alsaq ki, artıq 30 ildir müstəqil dövlətik, lakin Ermənistanla diplomatik əlaqələrimiz yoxdur. Bu, həmin ərazi iddialarının və uzun illər davam edən işğal siyasətinin nəticəsidir. Düzdür, Vaşinqton Bəyannaməsində Ermənistan liderinin imzası var, lakin Konstitusiyadakı bu problem hələ də həllini tapmayıb."
Deputat həmçinin Azərbaycanın mövqeyinin qəti olduğunu və Ermənistan Konstitusiyasından ərazi iddialarına dair müddəa çıxarıldıqdan sonra sülh sazişi imzalayacağını və əlaqələrin bərpası mümkün olacağını qeyd edib.
"Azərbaycanın mövqeyi qətidir: Ermənistan qeyd olunan düzəlişi etsə, sülh müqaviləsi imzalanacaq. Biz Ermənistanın daxili işlərinə qarışmırıq, onun daxili və xarici siyasətini müəyyənləşdirməsinə mane olmuruq. Sadəcə, yeganə tələbimiz Ermənistan Konstitusiyasında ölkəmizə qarşı olan ərazi iddialarının aradan qaldırılmasıdır." – deyə Aydın Mirzəzadə bildirib.
Elmir Heydərli
12:37 27.08.2025
Oxunuş sayı: 1551
