“Müstəqillik dövründə Birinci xanım institutunu sistemli şəkildə formalaşdıran Mehriban Əliyevadır” – Komitə sədri
Mehriban Əliyeva Azərbaycanın dövlət quruculuğunda və ictimai-siyasi həyatında xüsusi rol oynayan şəxsidir. Onun mədəni, humanitar və sosial sahədəki fəaliyyəti ölkəmizin adını beynəlxalq səviyyədə tanıtmış, həmçinin vətənimizin çətin məqamlarında xalqın yanında olmağı ilə fərqlənmişdir. Birinci vitse-prezident kimi həyata keçirdiyi layihələr, şəhid ailələrinə, məcburi köçkünlərə və əhalinin aztəminatlı qrupuna göstərdiyi diqqət və qayğı onun həm vətənpərvər, həm də xalqın etimadını qazanan şəxs olduğunu sübut edir.
Milli Məclisin İnsan hüquqları komitəsinin sədri Zahid Oruc Crossmedia.az-a açıqlamasında bildirib ki, Mehriban Əliyeva son 20 ildən artıqdır ki, Azərbaycanın ictimai-siyasi həyatında parlaq rol oynayan şəxsiyyətdir. Onun çevikliyi, cəsarəti, kübarlığı mədəni, humanitar və beynəlxalq sahədə gördüyü işlərlə ölkəmizin adını geniş məkana çıxarıb: “Hazırkı kommunikasiya inqilabı şəraitində milyonlarla insanın informasiya əldə etdiyi mühitdə lider mövqeyini qoruyub saxlamaq, xalqının ağır şəraitlərinə qatlaşmaq və iradə ilə addımlar atmaq asan deyil. Mehriban Əliyeva ölkəmizin Birinci xanımı kimi həm anaların, bacıların, həyat yoldaşlarının, həm də vətən uğrunda mübarizə aparan xanımların yanında olmuş, 44 günlük Vətən müharibəsində qazandığımız qələbədə xüsusi pay sahibi olmuşdur”.
Zahid Oruc qeyd edib ki, Ulu öndər Heydər Əliyevin həyat yoldaşı Zərfə xanımın cəmiyyətdə hörmətə layiq olması bir tərəfdən tariximizdə qadın nümunələrini göstərsə də, müstəqillik dövründə Birinci xanım institutu sistemli şəkildə formalaşmamışdı: “Bu institutu cəmiyyətə təqdim edən isə Mehriban Əliyevadır. Onun minlərlə məktəb layihəsi və himayə ehtiyacı olan uşaqlarla bağlı təşəbbüsləri institutun ölkəmizdə tanınmasına böyük töhfə vermişdir.
Beynəlxalq arenada, ABŞ, Fransa, Roma və digər ölkələrdə, həmçinin İSESCO-nun xoşməramlı səfiri kimi fəaliyyəti Mehriban xanımın gördüyü işlərin yalnız bir hissəsidir. Lakin onun sadəlik, təvazökarlıq və mehribanlığı ən böyük statusudur.
Birinci vitse-prezident kimi Mehriban Əliyeva dövlət quruculuğunu möhkəmləndirmiş, daxili təhlükələrdən qorunmaqda önəmli rol oynamışdır. Xüsusilə son illərdə, müharibə dövründə, hospital ziyarətləri, yaralı əsgərlərlə görüşlər və qələbə müjdələrinin paylaşılması zamanı Prezidentin yanında olmuşdur".
Deputat vurğulayıb ki, Mehriban xanımın fəaliyyəti yalnız təbrik və qiymət bildirmə deyil, həm də millətimizin qadın ordusunun apardığı mübarizəyə göstərilən münasibətin ifadəsidir: “Kəlbəcərdən Şuşaya qədər xalqımızın, xüsusilə qadınlarımızın yeni vətənin qurucuları kimi tarixdə öz izlərini qoymasında Mehriban Əliyeva ayrılmaz vətəndaş və liderdir”.
Mehriban Yariyeva
15:54 26.08.2025
Oxunuş sayı: 873
