Azərbaycanın Yaxın Şərq siyasəti: "Rəsmi Bakı bu haqqı qazanıb"
Azərbaycanın xarici işlər nazirinin müavini Yalçın Rəfiyev Səudiyyə Ərəbistanının Ciddə şəhərində keçirilən İslam Əməkdaşlıq Təşkilatının (İƏT) Xarici İşlər Nazirləri Şurasının fövqəladə sessiyasında çıxışı zamanı deyib ki, rəsmi Bakı Fələstin-İsrail münaqişəsinin diplomatik yolla həllinə dəstək göstərməyə hazırdır.
Sessiya zamanı Qəzza bölgəsində sürən hərbi gərginlik və humanitar böhranın narahatlıq mənbəyi olaraq qaldığı və bu vəziyyətə son qoyulması üçün təcili və qətiyyətli addımların atılmasının vacibliyi qeyd edilib.
Yalçın Rəfiyevin çıxışında Qəzza bölgəsində atəşkəsin əldə olunmasının və humanitar yardımın bölgəyə çatdırılmasına şəraitin yaradılmasının əhəmiyyəti vurğulanıb.
Azərbaycanın münaqişənin “iki dövlət” prinsipi əsasında, beynəlxalq hüququn norma və prinsipləri, BMT Təhlükəsizlik Şurasının müvafiq qətnamələrinə uyğun həllini dəstəklədiyi bir daha diqqətə çatdırılıb.
Eyni zamanda, Azərbaycanın Fələstin xalqının humanitar vəziyyətinin yüngülləşdirilməsi məqsədilə göstərdiyi yardımlarının bundan sonra da davam etdiriləcəyi vurğulanıb.
Azərbaycanın iki dövlət arasındakı vasitəçilik təşəbbüsləri barədə Crossmedia.az-a danışan Milli Məclisin Beynəlxalq münasbətlər və parlamentlərarası əlaqələr komitəsinin sədri Səməd Seyidov bildirib ki, Azərbaycan düyada böyük nüfuz qazanmış və yeni formalaşan beynəlxalq münasibətlər sistemində, yeni təhlükəsizlik sistemində əhəmiyyətli rol oynamaq imkanına malikdir: "Azərbaycan sözügedən istiqamətdə çox addım ata bilər. Artıq böyük işlər görmüşük. Azərbaycan Türkiyə ilə birlikdə Suriyada qaz nəqlinin çəkilməsinə böyük töhfə verir. Bir müddət bundan əvvəl Azərbaycanda Türkiyə - İsrail nümayəndələri arasında danışıqlar baş tutdu. Azərbaycan ABŞ ilə strateji əhəmiyyətli münasibətlərin normallaşması istiqamətində mühüm addım atır. Azərbaycanın Yaxın Şərq siyasəti və İslam dünyasında oynadığı rolu da unutmaq olmaz. Odur ki, nazir müavinin səsləndirdiyi fikirlər tamamilə haqlıdır. Azərbaycan sülhün yaranması istiqamətində atdığı addımlarla regionda yeni reallığın yaradılmasının memarı olaraq bu təşəbbüsləri irəli sürmək haqqını artıq qazanıb".
Kənan Novruzov
15:58 26.08.2025
Oxunuş sayı: 750
