Körfəz ölkələri Güney Qafqazda sülhün bərqərar olunmasında maraqlıdır -AÇIQLAMA
Avqustun 8-də Vaşinqtonda ABŞ Prezidenti Donald Trampın vasitəçiliyi ilə Azərbaycan və Ermənistan arasında sülh sazişi imzalanıb. Bu, Cənubi Qafqazın siyasi tarixində mühüm dönüş nöqtəsi kimi dəyərləndirilir. Sənəd uzun illər davam edən münaqişənin diplomatik yolla həllinə yönəlmiş ən ciddi təşəbbüslərdən biri hesab olunur. Sazişin icrası isə iqtisadi əməkdaşlıq və nəqliyyat-kommunikasiya xətlərinin bərpası üçün yeni imkanlar açır.
Mövzu ilə bağlı Crossmedia.az-a açıqlama verən politoloq Oqtay Qasımov bildirib ki, avqustun 8-i ABŞ Prezidenti Donald Trampın iştirakı ilə Vaşinqtonda imzalanmış sənəd böyük tarixi əhəmiyyətə malikdir: “Sənədin imzalanması ilə faktiki olaraq uzun müddətdən bəri davam edən regional bir münaqişəyə son qoyulması istiqamətində mühüm addım atıldı. Bu, Güney Qafqazda sülh və sabitliyə töhfə verə biləcək əhəmiyyətli bir razılaşmadır. Tərəflər bu sənədi imzalayarkən bir daha bölgədə barış və sabitlik qurmaq üçün konkret addımlar atacaqlarına dair iradə ortaya qoydular. Gərginliklərin təkrarlanmaması üçün mövqelərini ifadə etdilər ki, bu, ciddi bir hadisədir. Bu razılaşma gələcəkdə Güney Qafqazın sülh və əməkdaşlıq coğrafiyasına çevrilməklə bərabər qonşu regionlara da öz təsirini göstərəcək. Hesab edirəm ki, Güney Qafqazın qonşuluğunda yerləşən Yaxın, Orta Şərq və xüsusilə də Körfəz ölkələri Güney Qafqazda sülh və sabitlikdə maraqlıdırlar. Belə ki, Azərbaycanın müstəqillik qazandıqdan sonra prioritet istiqamətlərindən biri Yaxın, Orta Şərq və Körfəz ölkələri ilə münasibətlərin qurulması və inkişaf etdirilməsi idi. Məhz bu siyasət öz bəhrəsini ciddi şəkildə verib. Azərbaycanın hal-hazırda Səudiyyə Ərəbistanı, BƏƏ, Qətərlə yüksək səviyyəli münasibətləri var. Bu ölkələr Azərbaycanın hər zaman ərazi bütövlüyünü birmənalı dəstəkləyib. Bu münasibətlərin inkişafı həm də qarşılıqlı maraqlara əsaslanır. İşğaldan azad olunmuş ərazilərə bu ölkələr tərəfindən ciddi yatırımların qoyulması planlaşdırılır. Artıq bərpa olunan enerji sahəsində mühüm addımlar atılıb və layihələr həyata keçirilməkdədir. Körfəz ölkələri Azərbaycanla bərabər son dövrlər həm də Ermənistanla münasibətləri inkişaf etdirirlər. BƏƏ ilə Qətərin Ermənistanla münasibətləri inkişaf etdirməkdədir və ona ciddi investisiyalar yatırmaqdadır. Körfəz ölkələri dünya səviyyəsində böyük investorlar kimi tanındıqlarına görə, onlar Güney Qafqazda sülhün bərqərar olunmasında maraqlıdırlar. Sülh sabitliyi olan coğrafiyalara investisiyaların qoyuluşu da rahat olur. Məhz bu baxımdan Körfəz ölkələri gələcəkdə öz investisiyalarının təzyiq və təhdid altına düşməməsi üçün imzalanmış sənədi dəstəkləyirlər və Güney Qafqazda Azərbaycanla Ermənistan arasında sülhün ən qısa vaxtda əldə olunmasını arzulayırlar”.
Nəzrin Salmanova
15:24 26.08.2025
Oxunuş sayı: 6398
