“Zəngəzur dəhlizi yalnız Azərbaycan deyil, bütövlükdə region üçün böyük əhəmiyyət daşıyır”- RƏY
Türkiyənin nəqliyyat və infrastruktur naziri Abdulkadir Uraloğlu “Milliyet” qəzetinə müsahibəsində deyib ki, Zəngəzur dəhlizi Türkiyə, Azərbaycan və Ermənistan arasında iqtisadi əməkdaşlığı, regionda sülhü gücləndirəcək.
Onun sözlərinə görə, digər ticarət yolları ilə müqayisədə qısa olan Transxəzər Beynəlxalq Nəqliyyat Marşrutundan (Orta Dəhliz) tam istifadə olunarsa, Türkiyə qlobal logistikanın mərkəzinə çevriləcək: "Çindən Avropaya göndərilən yüklər Orta Dəhlizlə 18 günə gedə bilir. Qars-İğdır-Aralık-Dilucu dəmiryolu xətti işə düşəndən sonra bu müddət 14 günə düşəcək, Türkiyənin geostrateji liderliyi güclənrəcək. Hazırda Rusiyadan gedən nəqliyyat dəhlizi bağlıdır. Süveyş kanalından keçən Cənub Dəhlizi ilə yük 35 gün 7 saata daşınır. Yükləri dəniz yolu ilə Ümid burnundan keçən marşrutla isə 45 gün 22 saata daşımaq mümkündür. Həm dəniz, həm dəmiryolu ilə planlaşdırılan İnkişaf Yolu Layihəsi ilə bu göstərici 25 gündür”.
Zəngəzur dəhlizinin təkcə Türkiyənin deyil, Cənubi Qafqazın və Avrasiyanın gələcəyində mühüm rol oynacağını vurğulayan türkiyəli nazir qeyd edib ki, bu layihə beynəlxalq sülh və rifah üçün yol xəritəsidir: “Zəngəzur dəhlizi Türkiyə, Azərbaycan və Ermənistan arasında iqtisadi əməkdaşlığı, regional sülhü gücləndirəcək. Ermənistanın tək çıxış qapısı və Qərbə açılan qapısı bizik. Ermənistanla Azərbaycan arasında razılaşma əldə olunduqdan sonra bu ölkə ilə bizim bir çox əlaqələrimiz inkişaf edəcək, normallaşacaq. Ermənistan ilə əvvəllər işləyən xətlərimiz var idi: həm avtomobil, həm də dəmir yolu ilə”.
Məlum olduğu kimi avqust ayının 8-də ölkə ABŞ prezidenti Donald Trampın vasitəsilə Azərbaycan və Ermənistan arasında sülh yolunda ilk addım atıldı. Bu sülhün daxilində əlbəttə ki, Zəngəzur Dəhlizinin açılması da daxildir. Zəngəzur Dəhlizinin açılması təbii ki, Cənubi Qafqaz regionunda xüsusəndə ölkəmizə istər siyasi istər iqtisadi üstünlükləri vardır. Burda ən əsas məsələ isə Naxçıvan Muxtar Respublikasına bir başa olaraq quru yolun açılmasıdır. Bu təbii ki, zamanla öz faydasını göstərmiş olacaq. Bəs ümumən bu dəhlizin açılması Cənubi Qafqaza və ölkəmizə nə vəd edir?
Məsələ ilə bağlı Crossmedia.az-a açıqlama verən Milli Məclisin Deputatı Rövşən Muradov bu layihənin yalnız ölkəmiz üçün deyil, bütövlükdə region üçün əhəmiyyət daşıdığını qeyd edib: "Zəngəzur dəhlizi Azərbaycanın, xüsusilə Naxçıvanla ölkəmizin əsas hissəsi arasında birbaşa əlaqə yaradan strateji layihədir. Bu layihə yalnız Azərbaycan üçün deyil, bütövlükdə region üçün böyük əhəmiyyət daşıyır. Çünki dəhlizin istifadəyə verilməsi ilə Asiyadan Avropaya qədər uzanan geniş nəqliyyat-tranzit şəbəkəsi formalaşacaq. Zəngəzur dəhlizinin açılması işğaldan azad edilmiş ərazilərimizin inkişafına böyük təkan verəcək, həmin ərazilərdə infrastruktur layihələrinin həyata keçirilməsini sürətləndirəcək. Bu bölgələr uzun müddət ərzində bərpa və yenidənqurma işləri tələb etsə də, dəhlizin istifadəyə verilməsi həmin proseslərin daha effektiv həyata keçirilməsinə şərait yaradacaq”.
O bildirib ki, dəhlizin fəaliyyəti nəticəsində Orta Asiyadan, Çindən və digər regionlardan gələn yüklər Azərbaycanın ərazisindən tranzit kimi keçərək Avropaya daşınacaq: “Bu, ölkəmizin iqtisadi zonalarının əhəmiyyətini artıracaq, ticarət əlaqələrini genişləndirəcək. Layihə həmçinin regionda turizmin inkişafına da müsbət təsir göstərəcək. Vaxtilə Sovet dövründə bu ərazilərdən keçən dəmir yollarının bərpası sərnişin və yükdaşımaları daha əlçatan edəcək. Naxçıvan Muxtar Respublikasının iqtisadi inkişafı üçün dəhlizin önəmi xüsusidir. Təyyarə və avtomobil yollarından fərqli olaraq, dəhliz daha sərfəli və səmərəli nəqliyyat imkanı yaradacaq. Bu layihə Bakı–Tbilisi–Qars dəmir yolu qədər, hətta ondan daha əhəmiyyətli olacaq. Avqustun 8-də ölkə başçımız, Ermənistan rəhbərliyi və digər tərəflər arasında aparılan danışıqlarda bu marşrutun əhəmiyyəti bir daha vurğulanıb. Lakin bəzi dövlətlərin, xüsusilə İran və Rusiyanın maraqları səbəbindən layihənin icrasında müəyyən çətinliklər müşahidə olunur. Buna baxmayaraq, regionda sülh və əməkdaşlıq üçün Zəngəzur dəhlizi mühüm bir təşəbbüs kimi dəyərləndirilir".
Deputat, həmçinin bu layihənin iqtisadi və siyasi töhfələr verəcəyini də qeyd edib: "Bu layihə həm Azərbaycanın, həm də qonşu ölkələrin iqtisadiyyatına və siyasi sabitliyinə mühüm töhfələr verəcək, regionda sülh və əməkdaşlığın təmin olunmasına xidmət edəcək”.
Elmir Heydərli
23:15 25.08.2025
Oxunuş sayı: 17350
