Paşinyan: “Qarabağ hərəkatının davamı Ermənistanın müstəqilliyini məhv edərdi”
Ermənistanın Baş naziri Nikol Paşinyan ölkəsinin Müstəqillik Bəyannaməsinin qəbulunun ildönümü ilə bağlı açıqlama verib.
Crossmedia.az xəbər verir ki, bu barədə xarici KİV məlumat yayıb.
Paşinyan bildirib ki, 1990-cı il avqustun 23-də qəbul edilən sənəd Qarabağ hərəkatının təsiri ilə formalaşıb və həmin dövrün siyasi mühiti Ermənistanı daim qarşıdurma vəziyyətində saxlayıb.
Onun sözlərinə görə, sovet dövründən miras qalan “konflikt yönümlü vətənpərvərlik modeli” müstəqil dövlət quruculuğunu mümkünsüz edib: “Münaqişə kontekstində yaşayan ölkə gerçək müstəqillik qura bilməzdi”,-deyə o bildirib.
Baş nazir həmçinin 44 günlük müharibəyə toxunaraq qeyd edib ki, 2020-ci ilə qədər güzəştlərə getməməsinin əsas səbəbi dövlətçiliyin itirilməsi qorxusu olub:
“Əgər biz həmin vaxt güzəşt etsəydik, Ermənistanın bütün təhlükə və asılılıqları daha da artacaqdı. Bu isə dövlətçiliyimizin tam məhvi demək idi”.
Paşinyan vurğulayıb ki, hökumət hazırda “real Ermənistan ideologiyası” əsasında hərəkət edir. Bu strategiya Azərbaycan və Türkiyə ilə münasibətlərin normallaşmasına, Gürcüstan və İranla əlaqələrin dərinləşməsinə imkan yaradıb.
Həmçinin, o, Ermənistanın beynəlxalq aləmdə tanınmış 29, 743 kvadrat kilometr ərazisinin dövlətin ən böyük dəyəri olduğunu bildirib və qeyd edib ki, avqust 2025 Ermənistan üçün sülh və rifah dövrünün başlanğıcı kimi tarixə düşür.
Fatimə Məmmədova
10:24 23.08.2025
Oxunuş sayı: 5653
