Rusiyanın Azərbaycana qarşı aqressiyası artır: Türkiyə necə davranacaq?
Son dönəmlər şimal qonşumuz Rusiyanın ölkəmizə qarşı nümayiş etdirdiyi aqressiya heç də müsbət hal deyil. Bir həftə bundan öncə ABŞ vasitəsilə Azərbaycan-Ermənistan arasında imzalanan sülh müqaviləsi, əlbəttə, şimal qonşumuzun heç də maraqlarına cavab vermir. Rusiya tarixən Cənubi Qafqazda ağalıq etməyə çalışmış və bu gün də həmin imperialist düşəncələrindən təəssüflər olsun ki, əl çəkmir. Qardaş ölkə Türkiyə isə öz növbəsində yaranmış vəziyyətdə Azərbaycanın mövqəyini dəstəkləməsi isə Rusiyanı daha da hiddətləndirir. Maraqlıdır Rusiya hazırki vəziyyətdə Azərbaycana qarşı hərbi müdaxilə edə bilərmi. Bu müdaxilə edilərsə, qardaş ölkə Türkiyənin reaksiyası necə olar ?
Məsələ ilə bağlı Crossmedia.az- a açıqlama verən Milli Məclisin deputatı Tənzilə Rüstəmxanlı ümumən ölkəmizin istənilən bir dövlətlə münasibətlərində mənfi hallar yaşanarsa və həmin ölkə hərbi müdaxilə edərsə, Türkiyənin birmənalı şəkildə Azərbaycanın yanında olacağını və torpaqlarımızı müdafiə edəcəyini qeyd edib: “Azərbaycanla Rusiyanın münasibətlərinin gərginləşməsini qətiyyən arzulamıram və istəmirəm. Çünki uzun illər ərzində Qarabağın işğalı dövründən başlayaraq Rusiyanın Azərbaycana yönəltdiyi siyasətin acı nəticələrini görmüşük. Qarabağ torpaqları azad olunduqdan sonra da Rusiya hələ də Cənubi Qafqazı özünün “arxa bağçası” kimi qəbul edir, müstəqil dövlətlərə imperiya düşüncəsindən doğan siyasətini diktə etməyə çalışır. Ona görə də bu dövlətin həm Azərbaycana, həm Ermənistana, həm də Gürcüstana qarşı daim müəyyən təhdidlər yaratdığı məlumdur. Gürcüstanın problemlərini Abxaziya ilə, Azərbaycanın problemlərini isə Ermənistan vasitəsilə, Qarabağ məsələsini alətə çevirərək daim təsir altında saxlamağa çalışıb. Lakin bu gün müstəqil siyasət yeridən Azərbaycan, xüsusilə 44 günlük Vətən müharibəsində əldə edilən möhtəşəm qələbədən sonra bölgədə yeni reallıqlar yaradıb. Artıq Azərbaycan yalnız Cənubi Qafqazda deyil, həm də Yaxın və Orta Şərqdə sayılıb-seçilən, hörmət edilən bir dövlətə çevrilib. Cənab Prezident İlham Əliyev bu siyasətin memarı kimi həm regionda, həm də beynəlxalq miqyasda güclü lider olaraq qəbul edilir. Təbii ki, bu vəziyyət Rusiyanı narahat edir. Azərbaycanın ABŞ ilə son dövrdəki təmasları, o cümlədən Ağ Ev rəhbəri Donald Tramp ilə görüşlər, Ermənistanla sülh prosesində atılan addımlar, Zəngəzur dəhlizi ilə bağlı aparılan danışıqlar – bütün bunlar Moskvanın diqqətindən yayınmır və narahatlıq doğurur".
"Bununla belə, mən Rusiya ilə Azərbaycanın münasibətlərinin kəskinləşməsinin qəti əleyhinəyəm. İnanıram ki, belə bir vəziyyət yaranmayacaq. Azərbaycanın ən etibarlı dayağı olan Türkiyə ilə münasibətləri isə sadəcə dostluq və müttəfiqlik çərçivəsində deyil, qardaşlıq səviyyəsindədir. İki ölkə xarici siyasətdə daim bir-birini dəstəkləyir, qarşılıqlı maraqları qoruyur. Xüsusilə də tarixi Şuşa Bəyannaməsi bu birliyin ən güclü hüquqi-siyasi zəmanətidir. Həmin sənədə əsasən, Azərbaycana hər hansı hərbi təcavüz olacağı təqdirdə Türkiyə birmənalı şəkildə Azərbaycanın yanında olacaq və onun torpaqlarını müdafiə edəcəkdir”, - parlamentari əlavə edib.
Müsahibimiz həmçinin Rusiyanın və digər dövlətlərin bu günkü reallığı qəbullandığını, istər ölkəmizə, istər Türkiyəyə qarşı mənfi fikirlər barədə düşünmədiklərini qeyd edib: “Rusiya da, digər dövlətlər də bu reallığı yaxşı bilir. Ona görə də düşünmürəm ki, Moskva bu qədər irəli gedib həm Bakını, həm də Ankaranı kimi güclü dövləti qarşısına almağa cəhd etsin. Çünki artıq Azərbaycanın ərazi bütövlüyünə yönələcək hər hansı bir təhlükə Türkiyə tərəfindən cavabsız qalmayacaq. Necə ki, 44 günlük müharibədə Türkiyə bütün gücü ilə Azərbaycanın yanında oldu, bundan sonra da eyni mövqeyi davam etdirəcək”.
Elmir Heydərli
14:28 20.08.2025
Oxunuş sayı: 1042
