“Sülh prosesi həm Azərbaycanın, həm də Ermənistanın iqtisadiyyatına müsbət təsir göstərəcək” - Deputat
Məlum olduğu kimi “Fitch Ratings” Beynəlxalq Agentliyi Azərbaycanla-Ermənistan arasında imzalanan sülh müqaviləsindən sonra sülhün hər iki tərəfə verəcəyi iqtisadi üstünlüklər barəsində məlumat yayıb. Agentliyin açıqlamasına görə, razılaşma tərəflərin sovet dövrü sərhədlərini qəbul etməsini, silah gücündən istifadədən imtinanı və Azərbaycanın Naxçıvanla Ermənistan ərazisindən “maneəsiz əlaqə” əldə etməsini nəzərdə tutur. “Fitch” həmçinin qeyd edir ki, sazişin imzalanması qısamüddətli dövrdə ölkələrin reytinqlərinə təsir etməyəcək. Lakin orta müddətdə ticarətin genişlənməsi və iqtisadi artım üçün müsbət imkanlar yarada bilər.
Məsələ ilə bağlı Crossmedia.az-a açıqlama verən Milli Məclisin deputatı Vüqar Bayramov əldə olunan sülhün yeni imkanlar açacağını qeyd edib: “Azərbaycan ilə Ermənistan arasında əldə olunan sülh, şübhəsiz ki, Cənubi Qafqazın inkişafı üçün yeni imkanlar açır. Bu sülh yalnız siyasi sabitliyin təmin olunması deyil, eyni zamanda iqtisadi baxımdan da regionda yeni bir mərhələnin başlanğıcı kimi dəyərləndirilir.
Aparılan iqtisadi təhlillər və beynəlxalq təşkilatların verdiyi qiymətləndirmələr göstərir ki, sülh prosesi həm Azərbaycanın, həm də Ermənistanın iqtisadiyyatına müsbət təsir göstərəcəkdir. İlk növbədə, regiona daha çox sərmayənin cəlb olunması gözlənilir. Daha çox sərmayə isə yeni dəyər zəncirlərinin formalaşması, ümumi daxili məhsulun artması və nəticə etibarilə əlavə iş yerlərinin yaradılması deməkdir”.
Deputat həmçinin əldə olunmuş sülhün həm təhlükəsizlik baxımından sabitlik, həm də iqtisadi baxımdan dayanıqlı inkişaf qazanacağını əlavə edib: “Eyni zamanda, ölkə daxilində kommunikasiya xətlərinin bərpası və bütövlükdə Cənubi Qafqazda iqtisadi əməkdaşlıq mühitinin formalaşması regional inkişaf üçün geniş imkanlar açacaq. Bu prosesin ən mühüm nəticələrindən biri isə xarici investorların artan marağıdır.
Beləliklə, əldə olunmuş sülh həm təhlükəsizlik baxımından sabitlik, həm də iqtisadi baxımdan dayanıqlı inkişaf deməkdir. Bu, Cənubi Qafqazın gələcəyinə yeni üfüqlər açan tarixi bir mərhələdir”.
Elmir Heydərli
12:54 20.08.2025
Oxunuş sayı: 6746
