“Azərbaycan öz məsələsini özü həll etdi” - Deputat
Ermənistanın Baş naziri Nikol Paşinyan xalqa müraciətində deyib ki, Ermənistan və Azərbaycan 1991-ci il Almatı Bəyannaməsi əsasında bir-birinin sərhədlərinin toxunulmazlığını və ərazi bütövlüyünü tanıyıb.
“Bu, o deməkdir ki, tərəflər Ermənistan Respublikasının ərazisi ilə Azərbaycan Respublikasının ərazisinin hüquqi baxımdan keçmiş sovet respublikaları olan Ermənistan SSR və Azərbaycan SSR əraziləri ilə eyni olması faktından çıxış edirlər. Bu reallıq sərhədlərin demarkasiyası prosesində öz həllini tapmalıdır”, - o bildirib.
“Avqustun 11-də Ermənistan Respublikası ilə Azərbaycan Respublikası arasında sülh və dövlətlərarası münasibətlərin qurulması haqqında sazişin ilkin mətni dərc olundu. Və bir sıra uzun illər davam edən konspirasiya nəzəriyyələri bundan sonra iflasa uğradı. Vətəndaşlarımız sazişin imzalanması faktını razılıqla qarşıladı”, - Paşinyan əlavə edib.
Bu açıqlama Ermənistan və Azərbaycan arasında uzun illərdir davam edən münaqişənin həllində mühüm dönüş nöqtəsi hesab oluna bilər. Sərhədlərin qarşılıqlı tanınması regionda sabitlik və sülhün möhkəmlənməsinə imkan yarada bilər. Əsas məsələ bu razılaşmaların praktiki olaraq həyata keçirilməsidir.
Paşinyanın səsləndirdiyi fikirlər barədə Milli Məclisin deputatı Könül Nurullayeva Crossmedia.az-a açıqlama verib.
O, ərazi bütövlüyü məsələsinin hər zaman Azərbaycanın qırmızı xətti olduğunu bildirib:
“Ərazi bütövlüyü məsələsi hər zaman Azərbaycanın qırmızı xətti olub. İşğal dövründə danışıqların uzanması, rəsmi Bakıya ünvanlanan təkliflərdə ərazi bütövlüyü məsələsində müəyyən tərəddüdlər olduğu üçün Azərbaycan razılaşmırdı. Bu barədə dövlət başçımız da dəfələrlə bildirib. Nəhayət, Azərbaycan öz məsələsini özü həll etdi- ərazi bütövlüyü və suverenliyimiz bərpa olundu. Postmünaqişə dövründə keçirilən görüşlərdə də- 2022-ci ilin oktyabrında Praqa və Soçi görüşlərində Ermənistan Azərbaycanın ərazi bütövlüyünü, suverenliyini rəsmən qəbul etmişdi. Yəni qəbul etmişdi ki, Azərbaycan ilə Ermənistan arasında sərhədlər - 1991-ci ilin Almatı Bəyannaməsi əsasında həll olunmalıdır”.
Parlamentari qeyd edib ki, paraflanmış sənəddə də Azərbaycanın ərazi bütövlüyü Ermənistan tərəfindən tanınır: “Ermənistan Konstitusiyasının dəyişdirilməsi tələbi yerinə yetirildikdən sonra hər hansı təhdid qalmayacaq. Azərbaycanın heç vaxt Ermənistana qarşı ərazi iddiası olmayıb. Burada hər hansı mübahisı yoxdur. Məlum olduğu kimi, Ermənistan-Azərbaycan delimitasiya prosesində də 1991-ci il Almatı Bəyannaməsi əsas götürülür. Tərəflər ötən ilin aprelində razılaşıblar ki, prosesdə 1991-ci il Almatı Bəyannaməsinə əsaslanacaqlar. Paşinyan açıqlamalarında da qeyd edib ki, Ermənistan vətəndaşları sazişin imzalanması faktını razılıqla qarşıladı. Beləliklə, Ermənistan bütün öhdəliklərini yerinə yetirdikdən sonra yekun sülh müqaviləsinin imzalanması üçün heç bir maneə qalmır”.
Nicat Rüstəmzadə
21:21 19.08.2025
Oxunuş sayı: 6472
