"Azərbaycanın Ukraynaya humanitar yardımı Rusiya ilə münasibətlərə ciddi zərbə vurmayacaq" -RƏY
Azərbaycan xarici işlər naziri Ceyhun Bayramovla ukraynalı həmkarı Andrey Sibiqa arasında avqustun 16-da telefon danışığı aparılıb. A.Sibiqa Ukraynaya göstərilən humanitar yardımlara görə Azərbaycana təşəkkür edib.
Məlum olduğu kimi, rəsmi Bakı daim balanslı siyasət yürüdüb. Xarici siyasətinin əsas prioriteti isə sülh və əmin amanlıq çərçivəsində olub.
İkitərəfli əlaqələr və Azərbaycanın Ukraynaya davam edən humanitar yardımları barədə Milli Məclisin deputatı Elnarə Akimova Crossmedia.az-a müsahibə verib: "Azərbaycan birinci dəfə deyil ki, Ukraynaya humanitar yardım göstərir. Bu proses artıq bir neçə dəfə baş verib. Bu yardımlar əsasən, mülki əhaliyə dəstək xarakteri daşıyır. Ukraynanın xarici işlər naziri Andrey Sibiqanın təşəkkürü də məhz bu kontekstdə, humanitar sahədə həmrəylik jesti kimi qiymətləndirilməlidir. Rusiyanın bu yöndə Azərbaycanla münasibətlərinə xələl gəlməsi məsələsinə gəlincə, zənnimcə, ciddi şəkildə problem yaranmaz. Çünki Azərbaycan balanslı siyasət yürüdür və bunu dəfələrlə əyani şəkildə sübut edib. Həm Rusiya ilə strateji tərəfdaşlıq münasibətlərini qoruyur, həm də Ukraynanın ərazi bütövlüyünü dəstəkləyir. Humanitar yardımın göstərilməsi Moskva ilə münasibətlərə ciddi zərbə vurmaz. Çünki burada hərbi deyil, sırf insani dəstəkdən söhbət gedir. Rusiya da bu fərqi anlayır və yaxud anlamalıdır”.
Ayhan
16:13 18.08.2025
Oxunuş sayı: 21737
