Rusiyadan Azərbaycana qarşı düşmənçilik münasibəti: "İzahı verilmir" - Deputat
Ötən gecə Rusiya Silahlı Qüvvələrinin “Şahed” pilotsuz uçuş aparatları Ukraynanın Odessa şəhərində SOCAR-ın yanacaqdoldurma məntəqəsinə hücum edib. Hücum nəticəsində yanğın baş verib, infrastruktur zədələnib və əməkdaşlar yaralanıb.
Ümumiyyətlə, son zamanlar Rusiya müntəzəm olaraq SOCAR-ın yanacaqdoldurma məntəqələrini hədəf alır. Bu, rəsmi Moskvanın Bakıya qarşı aqressiyasının növbəti bariz nümunəsidir. Bu ritorika hara qədər davam edəcək? Bakı hansı müvafiq addımları atmalıdır?
Bu barədə Crossmedia.az-a danışan Milli Məclisin deputatı Fazil Mustafa bildirib ki, bu, düşmənçilik münasibətidir: "Amma bunun hələ rəsmi səviyyədə hansısa bir şəkildə izahı verilmir və bunun Ukrayna ilə müharibə kontekstində aparıldığı söylənilir. Bu, hər halda xoşniyyətli bir davranış deyil və bilavasitə Azərbaycanı hədəf alan davranışdır. Azərbaycan birinci növbədə diplomatik vasitələrlə bunu mütləq diqqətə çatdırmalıdır və öz münasibətini ortaya qoymalıdır. Hər halda, bu məsələ yaxşı niyyətdən xəbər vermir. Qonşu dövlətlərlə hər zaman həssas şəkildə dostluq münasibətlərini davam etdirməyə maraqlı olduğumuzu söyləyirik. Amma bu şərtlərlə böyük bir problem yaşandığını da görməkdəyik. Elə etməliyik ki, münasibətlərin hədsiz kəskinləşməsinə getmədən, bu cür aqressiv hərəkətlərin qarşısını almağa nail ola bilək. Bunun üçün də diplomatiyamız və müvafiq qurumlarımız aktiv fəaliyyətini gücləndirməlidirlər".
Mehriban Yariyeva
15:29 18.08.2025
Oxunuş sayı: 31948
