"İlham Əliyevin qətiyyətli mövqeyi Cənubi Qafqazda sülh prosesinə çox ciddi töhfələr verdi" - Deputat
Ümumdünya Səhiyyə Təşkilatının Baş direktoru Tedros Adhanom Azərbaycan Prezidenti İlham Əliyevə təbrik məktubu göndərib. Məktubda Azərbaycanın sülh prosesinə verdiyi töhfələr və beynəlxalq səhiyyə sahəsindəki rolu yüksək qiymətləndirilib.
Məsələyə münasibət bildirən deputat Elman Nəsirov Crossmedia.az-a açıqlamasında bildirib ki, ÜST-nin Baş direktoru Prezident cənab İlham Əliyevə göndərdiyi təbrik məktubunun məzmununun əsas hissəsi "Azərbaycan prezidentinin Vaşinqtonda Ermənistan baş naziri ilə birlikdə əldə etdiyi tarixi razılaşmalarla bağlıdır və əldə edilmiş tarixi uğurları ifadə edir".
Deputat vurğulayıb ki, Baş direktor Azərbaycan prezidentini təbrik edir ki, "Sizin qətiyyətli prinsipal mövqeyiniz nəticə etibarilə Cənubi Qafqazda sülh prosesinə çox ciddi töhfələr verdi və bunun da nəticəsində əldə edilmiş Vaşinqton razılaşmalarına əsasən də regionda sülhün, təhlükəsizliyin, əmin-amanlığın təminatı istiqamətində həlledici addımlar atıldı".
Eyni zamanda ÜST-nin baş direktoru ona diqqəti cəlb edib ki, "Azərbaycanla yolxucu xəstəliklər, qeyri-infeksion xəstəliklərin qarşısının alınması, ana və uşaq sağlamlığının təmin edilməsi istiqamətində əlaqələrin dərinləşdirilməsində maraqlıyıq və həm də onuda ifadə edir ki, Azərbaycan bu prosesdə böyük töhfələr vermiş dövlətdir və bundan sonra eyni siyasətin daha da inkişaf etdirilməsi niyyətindəyik" - deyə Elman Nəsirov əlavə edib.
"Bu müraciət onu ifadə edir ki, ÜST Azərbaycanın təkcə regionda sülhə və təhlükəsizliyə böyük töhvə vermək imkanını qiymətləndirmir eyni zamanda beynəlxalq səhiyyə institutunun inkişafına, dünyada sağlamlığın qorunması prosesinə Azərbaycanın töhvə vermək potensialının böyüklüyünə olan etimad bu məktubda öz əksini tapmışdır",- deyə deputat fikirlərini yekunlaşdırıb.
Bənövşə Zahidli
18:17 16.08.2025
Oxunuş sayı: 11395
