"Müharibənin bitməsi hər iki xalqın gələcəyi üçün önəmlidir" - Deputat
Sosial Tədqiqatlar Mərkəzi (STM) ABŞ Prezidenti Donald Trampın vasitəçiliyi ilə Prezident İlham Əliyev və Ermənistan Baş naziri Nikol Paşinyan arasında Vaşinqtonda keçirilən görüş və imzalanan bəyannamələr, həmçinin Azərbaycan və ABŞ arasında strateji tərəfdaşlıq məsələləri ilə bağlı ölkə ictimaiyyətinin fikirlərini öyrənmək məqsədilə sorğu keçirib. Sorğu nəticəsində respondentlərin 77,2%-i Azərbaycanla Ermənistan arasındakı Birgə Bəyannaməni uğurlu hesab edir. Ermənistan cəmiyyətində vəziyyət necədir? Azərbaycan-Ermənistan arasında normallaşma prosesini necə qarşılayırlar?
Mövzu ilə bağlı Milli Məclisin deputatı Ceyhun Məmmədov Crossmedia.az-a açıqlama verib:
“Azərbaycan xalqı qalib xalq kimi təbii ki, Azərbaycan-Ermənistan arasındakı bəyannaməni alqışlayır. Və bu bəyannamə cənab prezident İlham Əliyevin rəhbərliyi ilə Azərbaycanın böyük uğuru və nailiyyətidir. Biz xalq olaraq qələbəmizi təmin etmişik. Biz xalq olaraq öz uğurlarımızı bu bəyannamə ilə daha da möhkəmləndirmişik. Ermənistana gəldikdə isə orda bir az vəziyyət fərqlidir. Söhbət ondan gedir ki, ermənilərin bir hissəsi bunu məğlubiyyət kimi qəbul edir. Əslində bu ermənilər üçün də çox önəmli sənəddir. Çünki müharibənin bitməsi hər iki xalqın gələcəyi üçün önəmlidir. Ermənistan cəmiyyətinin separatçı-radikal kəsimi bu sülhü istəmir və dəstəkləmir. Amma Ermənistanın gələcəyini düşünən və Ermənistan cəmiyyətinin gələcəyini istəyən ermənilər isə sülhü dəstəkləyir”.
Ayhan
17:04 16.08.2025
Oxunuş sayı: 6825
