"Zəngəzur dəhlizinin açılması ilə həm də Ermənistan qazanacaq" - Parlamentari
Prezident İlham Əliyev “Fox News”a açıqlamasında deyib ki, Zəngəzur dəhlizi yeni bağlantı layihəsidir və beynəlxalq nəqliyyat marşrutlarının mühüm hissələrindən biri olacaq.
Zəngəzur dəhlizi tək Azərbaycan və Ermənistan üçün yox ümumilikdə region və dünya dövlətləri üçün strateji əhəmiyyətə malikdir. Asiya dövlətləri, İran məhz bu dəhliz vasitəsilə Avropaya rahat çıxış əldə edir. Bu dəhliz bütün dünya dövlətləri üçün geniş iqtisadi imkanlar açır.
Dövlət başçısının səsləndirdiyi fikirlər barədə Crossmedia.az-a danışan Milli Məclisin deputatı Aydın Mirzəzadə deyib ki, Zəngəzur dəhlizi təkcə Azərbaycanın əsas hissəsi ilə Naxçıvan arasında əlaqə marşrutu yox eyni zamanda dünya səviyyəli strateji layihədir: "Heç də təsadüfi deyil ki, ABŞ prezidenti Donald Tramp həmin marşruta“Tramp yolu” adı verilməsi ilə razılaşdı Erməni işğalı dövründə bağlı olan bu yol yenidən Azərbaycan və Ermənistan arasında marşrut oldu. Zəngəzur dəhlizi və Naxçıvan vasitəsilə Asiya dövlətləri təhlükəsiz və qısa bir müddətə Avropaya çıxış əldə etdilər. Burada isə qazanan tək Azərbaycan yox, həm də Ermənistan olacaq. Azərbaycan bu dəhlizdən istifadə edərkən öz ərazisi olduğu üçün ödəniş etməyəcək. Amma digər dövlətlər həm Azərbaycandan, həm də Ermənistan ərazisindən keçdikləri üçün yoxlanılacaqlar və gömrük rüsumu ödəyəcəklər. Digər tərəfdən cənab prezident İlham Əliyev çıxışında bildirdi ki, bu tək nəqliyyat marşrutu deyil. Buradan elektrik enerjisi, hiperoptik internet xətləri, həmçinin digər kommunikasiya xətləri də keçə bilər. Bundan başqa Zəngəzur dəhlizi vasitəsilə Ermənistan çox sayda turistlər də cəlb edə biləcək. İran da bu xəttə qoşulmaqla Avropaya çıxışını asanlaşdıracaq. Bir sözlə, Azərbaycanın uzun illərdir təklif etdiyi və artıq reallaşmağa çox yaxın olan layihə qüvvəyə minir. Bütün texniki məsələlər bitdikdən sonra bu dəhlizin dünyaya xeyir gətirdiyinin şahidi olacağıq".
Ayhan
16:07 15.08.2025
Oxunuş sayı: 1446
