“Türkiyə, Azərbaycan və Gürcüstan regionda təhlükəsizlik konfiqurasiyasının formalaşmasına töhfə verib” -RƏY
Türkiyə Prezidenti Rəcəb Tayyib Ərdoğan bildirib ki, Azərbaycan və Gürcüstanla birlikdə regional təhlükəsizliyə töhfə verirlər, parlament səviyyəsində üçtərəfli görüşün keçirilməsi planlaşdırılır. O, həmçinin Azərbaycan-Türkiyə-Gürcüstan üçtərəfli mexanizminin regional proseslərdə mühüm rol oynadığını vurğulayıb.
Mövzu ilə bağlı Crossmedia.a-a açıqlama verən Beynəlxalq Münasibətlərin Təhlili Mərkəzinin baş məsləhətçisi, politoloq Mətin Məmmədli bildirib ki, 15 ildən artıq bir dövrdə belə bir format xüsusilə təhlükəsizlik istiqamətində güclü bir şəkildə formalaşıb. Onun sözlərinə görə, 2012-ci ildə qəbul olunmuş “Trabzon deklarasiyası” üç ölkənin və ümumilikdə Cənubi Qafqazın davamlı təhlükəsizlik mühitinin formalaşmasına ciddi töhfə verib.
Politoloq qeyd edib ki, kənardan gələn təhdidlərin neytrallaşdırılmasında bu üçlü formatın və üç ölkənin təhlükəsizlik sahəsində əməkdaşlığı mühüm rol oynayıb.
“Türkiyə, Azərbaycan və Gürcüstan bir növ regionda həm təhlükəsizlik, həm də geosiyasi konfiqurasiyanın formalaşmasına töhfə verib”, – M. Məmmədli vurğulayıb.
O əlavə edib ki, ölkələr bu formatda hazırda enerji, logistika və təhlükəsizlik sahələrində yaxından əməkdaşlıq edir və gələcəkdə də regionda bu istiqamətdə proseslərin inkişafına müsbət təsir göstərəcək.
Mehriban Yariyeva
15:19 13.08.2025
Oxunuş sayı: 1587
