Azərbaycanla Ermənistan arasında iqtisadi əlaqələr bərpa olunur?: "Cəmiyyət reallıqları anlayır"
"Dünya iqtisadiyyatı və Azərbaycan" (Layihənin müəllifi Rüfət Quliyevdir)
ABŞ-nin paytaxtı Vaşinqtonda avqustun səkkizində Azərbaycan və Ermənistan arasında əldə olunmuş razılaşma çərçivəsində tərəflər iqtisadiyyat, tranzit, nəqliyyat, ətraf mühit, humanitar və mədəni sahələrdə əməkdaşlığın təsis edilməsi üçün qarşılıqlı razılıq əsasında müxtəlif sahələrdə ayrıca sənədlər imzalayıblar. Azərbaycan Xarici İşlər Nazirliyinin yayımladığı məlumatda qeyd olunur ki, bu sənədlər regionda sülhün, sabitliyin və inkişafın təmin olunmasına mühüm töhfə verəcək. Beləliklə, iki ölkə arasında münasibətlərin normallaşması üçün ciddi addımlar atılır və iqtisadi əlaqələrin bərpası üçün əlverişli zəmin yaranır. Bəs tərəflər arasında iqtisadi əlaqələrin bərpası nə qədər realdır?
Bu barədə Crossmedia.az-a danışan Milli Məclisin dörd çağırış deputatı, iqtisad elmləri doktoru, professor Rüfət Quliyev bildirib ki, sülh müqaviləsi istiqamətində birinci addım, yəni paraflanma artıq yekunlaşıb: "Yəni artıq bu mətn hər iki ölkə tərəfindən qəbul olunub və ABŞ prezidentinin imzası ilə təsdiq olunub. Minsk Qrupu artıq birmənalı olaraq oyundan çıxıb. İndi qalıb Ermənistanın Azərbaycana ərazi iddialarını nəzərdə tutan bəndi öz konstitusiyasından çıxarması. 2026-cı ildə referendum keçiriləcək və çox güman ki, bu məsələ müsbət həll olunacaq. Ermənistanda insanlar bunu başa düşür. ümumiyyətlə bütün ölkələr bizim bu addımımızı müsbət dəstəkləyirlər".
Professorun fikrincə, iqtisadi və maliyyə münasibətlərinin qurulması üçün əvvəlcə diplomarik əlaqələr bərpa edilməlidir: "Ancaq indiki vəziyyətdə bunu təşkil etmək mümkün deyil. Müəyyən vaxt və zaman lazımdır. Amma, əlbəttə, gələcək üçün istisna deyil. Ümumiyyətlə, Zəngəzur dəhlizi açılarsa, istər-istəməz Ermənistanın iqtisadiyyatı da beynəlxalq iqtisadiyyata inteqrasiya olunacaq, o cümlədən Azərbaycan iqtisadiyyatı ilə kifayət qədər münasibətlər yaranacaq. İlk öncə nəqliyyat məsələləri önə çıxır. Burada təkcə Ermənistana yox, həmçinin Asiya və Avropa qitələrində olan ölkələrin hamısına müsbət təsir olacaq. Bu formada mərhələ-mərhələ iqtisadi münasibətlər inkişaf edə bilər. Əsas məsələ odur ki, Ermənistan bu məsələdə daha maraqlı olmalıdır. Çünki qapalı ölkədir. Cəmiyyəti reallıqları yaxşı başa düşür və prosesləri dəstəkləyir".
Mehriban Yariyeva
14:07 12.08.2025
Oxunuş sayı: 5908
