Hökumənin ölümü ilə başlayan yeni mərhələ: Olmaz olsun Rusiya kimi qonşu!
2024-cü il dekabrın 25-nə qədər Hökumə Əliyevanı ailəsi, dostları, əzizləri istisna olmaqla, yəqin ki, çoxları tanımırdı. O, yüzlərlə digərləri kimi sadəcə təyyarə bələdçisi idi. Müntəzəm olaraq səfərlər edir, sonra sağ- salamat ölkəsinə, onu gözləyənlərin və sevənlərin yanına qayıdırdı. Azərbaycan Hava Yollarına məxsus təyyarələrlə müxtəlif istiqamətlərə səfərlərə həm özü, həm də əzizləri öyrəşmişdi.
Ötən il dekabrın 25- i günü Qroznıya uçuşdan sonra da onu gözləyənlər var idi. Hər kəs Hökumənin həmişəki kimi sağ – salamat qayıdacağına inanırdı. Amma həmin gün qəfil xəbərlə bütün Azərbaycan sarsıldı: saytlar Bakı- Qroznı təyyarəsinin qəzaya uğradığını yazırdılar. Çox keçmədən isə detallar üzə çıxdı, həqiqətlər bəlli oldu.
Məlum olduğu kimi, hadisə nəticəsində 34 nəfər həlak olub. Onların arasında üç nəfər ekipaj üzvü- İqor İvanoviç Kşnyakin, Aleksandr Georgiyeviç Kalyaninov, Hökumə Cəlil qızı Əliyevaya da var idi. Ölümlərindən sonra Prezident İlham Əliyevin müvafiq Sərəncamı ilə həmin şəxslərə Milli Qəhrəman adı verildi.
Rəsmi Bakı hadisə ilə əlaqədər dərhal hərəkətə keçdi, xüsusi komissiya yaradıldı, araşdırmalar başlandı.
Aydınlaşdı ki, əslində məsələ heç də təqdim olunduğu kimi deyil: Təyyarə nə qəzaya uğrayıb, nə də quş dəstəsi ilə toqquşub. Vurulub! Özü də Rusiya tərəfindən. Ortaya qoyulan faktlar, dəlil- sübutlar rus təbliğatının işləməsinə imkan vermədi. Azərbaycan dövləti və xalqı qarşı tərəfdən izah və üzr tələb etdi. Hələ də edir. Rəsmi Moskva isə “ağzına su alıb oturur”. Mediadan əskik olmayan səhərdən axşama qədər “xüsusi əməliyyat” deyə - deyə ancaq özlərini aldatmağı bacaran Rusiya prezidentinin mətbuat xidmətinin rəhbəri Dmitri Peskov, xarici işlər naziri Sergey Lavrov, nazirliyin sözçüsü Mariya Zaxarova, bütün dünyanı nüvə silahı ilə qorxutmağa çalışan Təhlükəsizlik Şurasının sədr müavini Dmitri Medvedev və başqaları sözügedən hadisə ilə bağlı heç bir dişə dəyə açıqlama vermədilər, vermirlər. Sanki təyyarənin vurulmasına rəhbərlik edən döyüş ekipajına Dmitri Sergeyeviç Paladiçuk rəhbərlik etməyib. Əgər Rusiya hakimiyyəti, Müdafiə Nazirliyi tanımırsa, mən deyim, Padadiçuk “Pantsir-S” zenit-raket-artilleriya kompleksinin 274 saylı döyüş maşınının baş hesablayıcısıdır. O, 14-cü ordunun mobil ehtiyat qüvvələrinə daxil olan 80-ci zenit-raket alayının 1-ci divizionunda xidmət edir. Məhz onun idarə etdiyi ekipaj təyyarəmizə zərbə endirib. Bunları xüsusi araşdırma nəticəsində əldə etməmişəm. Qeyd etdiklərimi, az qala, bütün dünya bilir. Elə Rusiya özü də.
Rusiya hakimiyyəti dəvəquşu misalı “başını yerə soxsa” da, bu, heç də utancdan, xəcalətdən deyil...
...Hadisənin üzərindən yeddi ay keçib. İstintaq davam edir. Sonda nəticənin necə olacağını indidən demək çətindir. Amma, düzü, nə jurnalist, nə də siyasətlə az – çox maraqlanan biri kimi rəsmi nəticənin nə olması mənim üçün o qədər də maraqlıdıd. Bütün Azərbaycan xalqı həqiqəti bilir. Açığı, Rusiyanın Qazaxıstana təzyiq göstərək nəticənin saxtalaşdırmağa cəhd etməsini də istisna etmirəm. Hər halda mən son zamanlar Rusiyadakı azərbaycanlılara qarşı ciddi təzyiq və təqiblərə başlayan, soydaşlarımızı işgəncə ilə öldürən şimal qonşumuzdan nə desəz gözləyirəm.
Fəqət, dediyim kimi, rəsmi nəticə mənim üçün elə də əhəmiyyətli deyil. İndi vacib olan Rusiyanın üzr istəməsidir...
Bu gün Hökumə xanımın doğum günüdür. O xanım ki, təyyarə vurulduğu zaman sərnişinləri sakinləşdirməyə çalışaraq, “Hər şey yaxşı olacaq” demişdi. Özü də dəfələrlə. Həmin səs yazısını, yəqin ki, çoxumuz dinləmişik. Bələdçinin həmin an nə düşündüyünü, kimləri yada saldığını heç birimiz bilmirik. Bəlkə də, ailə üzvlərinin səsini eşitmək, üzünü görmək istəyirdi. Bilmirəm. Amma bunu dəqiq bilmirəm: Bu gün nəinki ailəsi, Azərbaycanın böyük əksəriyyəti Hökumə xanımı hüznlə xatırlayır, səsini yadına salır, “Allah rəhmət eləsin” deyir. Rusiya hakimiyyəti yalnız özünün haqlı bildiyi müharibəsini davam etdirməklə məşğuldur. Bir atalar sözü var. Deyirlər ki, düşmən dar gündə tanınar. Moskva nəinki dar gündə yardım edir, hətta kədər- qəm verir. Eyni ilə 20 Yanvar faciəsində, Xocalı faciəsində olduğu kimi. Vallah kimsə inciməsin, amma olmaz olsun belə qonşu...
Həmin təyyarə qəzasından bəri Rusiyanın Azərbaycana qarşı aqressiyası davam edir. Bu günlərdə Mokskvanın siyasətinin əsl səbəbi bir daha, daha aydın şəkildə üzə çıxdı: Bakı ilə İrəvan arasında davam edən normallaşma prosesi idi Moskvanı narahat edən. Azərbaycan Prezidenti İlham Əliyev və Ermənistan baş naziri Nikol Paşinyan ABŞ-dədirlər. Ağ Ev rəhbəri Donald Trampın iştirakı ilə mühüm əhəmiyyətli sənədlərin imzalanacağı gözlənilir. Bu, sülh sazişi də ola bilər. Rusiya aylardır ki, məhz buna mane olmaq üçün hər iki qonşusuna- həm Azərbaycana, həm də Ermənistana təzyiq göstərirdi. Lakin yaxşı bir misal var: Rusiya nə qədər tünd olarsa, öz küpünü çatladar. Elə belə də oldu...
Sanki təyyarə qəzasından və Hökumə xanımın həlak olmasından sonra Rusiya- Azərbaycan münasibətlərində yeni mərhələ başlandı. Moskva əsl simasını üzə çıxaran kimi Cənubi Qafqaza gün doğdu. Görünür, məsələ Ermənistanın destruktivliyindən çox, Rusiyanın riyakarlığında imiş. Bu da növbəti bir fakt...
Əlbəttə, Hökumə xanımın bütün bunlardan yaxşı xəbəri var. Getdiyi yerdən hər şeyi görür, izləyir. Bəlkə də, Tovuz döyüşlərinin şəhidi general- mayor Polad Həşimovla birlikdədir. Bəlkə də, arada danışırlar bu olanlar barədə. Əslində mən hər iki qəhrəmanımızın taleyini bir – birinə oxşadıram: hər ikisi təxribata qurban getdi, hər ikisi kənar qüvvələrin(müxtəlif araşdırmalar nəticəsində məlum olmuşdu ki, Polad Həşimovun şəhid olmasında da Rusiyanın əli var) gülləsi ilə vuruldu və hər iki hadisədən sonra biz “bir ölər, min doğularıq” prinispi ilə yenidən ayağa qalxdıq. Tovuz hadisələrindən sonra Azərbaycan İkinci Qarabağ müharibəsinə başlayaraq torpaqlarını işğaldan azad etdi, təyyarəmizin vurulmasının ardınca isə Rusiyanın Cənubi Qafqazla bağlı yüz illik planı iflasa uğramaqdadır. Rus dilində buna nə deyirlər bilmirəm. Amma Azərbaycan dilində “Allahın ədaləti” deyirlər.
Ruhunuz şad, məkanınız cənnət olsun, Hökumə xanım. Siz yeni tarixin əsasını qoydunuz. Əmin olun, arxayın olun, indi hər şey yaxşıdır! Lap yaxşı!
Kənan Novruzov
15:20 08.08.2025
Oxunuş sayı: 7450
