ABŞ və Çin "dil tapır": Rusiya "oyundankənar" vəziyyətdə qalır
"Dünya iqtisadiyyatı və Azərbaycan"(Layihənin müəllifi Rüfət Quliyevdir)
ABŞ- Rusiya münasibətləri getdikcə gərginləşir.
ABŞ Prezidenti Donald Tramp artıq rusiyalı həmkarı Vladimir Putinlə danışmaqda
maraqlı olmadığını bildirib və qarşı tərəfə Ukrayna ilə danışıqlara başlamaq
üçün on gün vaxt verib. İndi bütün dünyanı düşündürən sual on gündən sonra nə
olacağıdır?
Bu barədə Crossmedia.az-a danışan
Milli Məclisin dörd çağırış deputatı, iqtisad elmləri doktoru, professor Rüfət
Quliyev söyləyib ki, Rusiya- Ukrayna savaşının sonu görünmür: “Rusiya bir neçə
ildir bütün Qərblə müharibə aparır. Əlbəttə, bu, hər iki tərəfin
iqtisadiyyatına ciddi təsir edir. Həm Rusiyada, həm də Qərbdə Ümumdaxili Məhsulun
artım tempi azalır, inflyasiyasını cilovlamaq çətinləşir. Bu, Rusiyanın böyük şəhərlərində,
o cümlədən Moskvada, Sankt- Peterbruqda o qədər hiss olunmasa da, ümumilikdə vəziyyət
çətindir. İkinci bir tərəfdən, nəzərə almaq lazımdır ki, planetdəki təbii sərvətlərin
40 faizdən çoxu Rusiyadadır. Deməli, Rusiyanın iqtisadi cəhətdən savaşı davam
etdirmək üçün hələ ki, imkanı var. Ümumiyyətlə, Rusiya son min ildə ancaq
torpaq tutub, heç vaxt ərazi itirməyib. Hazırda ən çox itirən Ukraynadır.
Ukrayna büdcəsinin formalaşmasında Qərb mühüm rol oynayır. Əlbəttə, bu vəsait
bu və ya digər formada haçansa qaytarılacaq və qaytarılmalıdır. Rusiyaya gəldikdə
isə bildirməliyəm ki, bu dövlət cəbhədə kiçik uğurlar əldə etsə də, itkiləri
kifayət qədər çoxdur”.
Müsahibimiz bildirib ki, hazırkı vəziyyət,
o cümlədən müharibənin davam etməsi böyük korporasiyaların, dünyanı idarə edən
nəhəng iqtisadi güclər savaşın davam etməsində maraqlıdır. ABŞ məqsədinə çatır:
Rusiyanə zəiflədir və Avropanı özündən asılı vəziyyətə salır. Avropa ilə ABŞ
arasında imzalanan saziş də bunu göstərir. İndiyə kimi Ukraynanı silahlandıran
ABŞ bundan sonra həmin silahları Avropaya göndərəcək, pul qazanacaq. Avropa isə
silahların Ukraynaya hansı formada tədarükünə
özü qərar verəcək. Amma, əlbəttə, burada silahların hədiyyə edilməsindən söhbət
gedə bilməz. Onu da deyim ki, ABŞ-nin əsas məqsədlərindən biri də Çini
Rusiyadan qoparmaqdır. Ümumiyyətlə, ABŞ üçün ən böyük iqtisadi təhlükə Çindir. Pekin
və Moskva getdikcə dil tapırlar”.
Professorun sözlərinə görə, həm Qərb,
həm də Rusiya iqtisadiyyatı getdikcə tənəzzülə uğrayır: “Ən çox əziyyət çəkən
isə xalqdır. Davam edən Rusiya- Ukrayna müharibəsindən bütün ölkələr əziyyət çəkir.
İnfliyasiya göstəriləciləri 3,5- 4 faizə çatır. Belə bir vəziyyətdə Azərbaycan
çox düzgün stratehiya yeridir. Dünya dövlətləri ilə münasibətlərimiz getdikcə
inkişaf edir. Azərbaycan öz gələcəyinə arxayındır”.
Kənan Novruzov
16:20 30.07.2025
Oxunuş sayı: 8081
