"Mənim də adım FETÖ prosesində hallandırılmışdı" - Deputatdan maraqlı AÇIQLAMA
Bu gün 15 Temmuz (iyul) FETÖ çevriliş cəhdinin üzərindən düz 10 il ötür. 2015-cı ilin həmin qanlı gecəsində qardaş Türkiyə xalqı əliyalın şəkildə demokratiyasını, dövlətini və liderini qorumaq üçün ayağa qalxaraq dünyaya unudulmaz bir dərs verdi. O gecə təkcə Türkiyənin deyil, bütün Türk dünyasının yaddaşına qəhrəmanlıq və birlik simvolu kimi yazıldı. Bu münasibətlə Azərbaycan Prezidenti İlham Əliyev Türkiyə Prezidenti Rəcəb Tayyib Ərdoğana başsağlığı ünvanlayaraq qardaşlıq və həmrəylik mesajı verdi. Deputatlar da bu hadisənin tarixi əhəmiyyətini vurğulayaraq, 15 Temmuzun təkcə Türkiyə üçün deyil, Azərbaycan üçün də dərslərlə dolu bir dönüş nöqtəsi olduğunu qeyd edirlər.
Deputat Tənzilə Rüstəmxanlı Crossmedia.az saytına açıqlamasında bildirib: "Türkiyənin dövlətçilik tarixində ən əhəmiyyətli hadisələrdən biri də 15 Temmuz FETÖ qiyamıdır. Amerikanın yetişdirdiyi və Türkiyənin içinə bir şəbəkə olaraq yerləşdirdiyi Fətullah Gülən Terror Təşkilatının dövləti ələ keçirmək məqsədilə təşkil etdiyi çevriliş cəhdidir. Bu hadisə böyük bir dövləti ələ keçirməyə yönəlmiş hərəkat kimi qiymətləndirilə bilər.Türkiyədə xalqın iradəsi, xalqın dövlətlə birgə hərəkət etməsi, onu qorumaq naminə küçələrə çıxması, canı bahasına mübarizə aparması bu qiyamın qarşısını aldı. Tanklar və helikopterlərlə xalqın üzərinə gələn, hətta Qazi Milli Məclisi bombalayan, ora raket atan bir zehniyyətə – bir terror təşkilatına qarşı xalq əliyalın duraraq bu hərəkatın uğur qazanmasına imkan vermədi".
T.Rüstəmxanlı qeyd edib: "Türkiyə milləti və dövləti birlikdə, böyük Türk millətinin və Atatürkün qurduğu Cümhuriyyəti qorumağı bacardı. Zəfərin adı Türkiyədir, Türk millətidir".
Deputat vurğuladı ki, Türk milləti Çanaqqalada göstərdiyi qəhrəmanlıq kimi, 15 iyulda da yenidən bir qəhrəmanlıq dastanı yazdı və Türkiyədə hər zaman Atatürkün böyük ifadəsi — "Vətən sağ olsun" — bir daha özünü əsrin əvvəlində, həm də 19 və 20-ci əsrlərin əvvəlində olduğu kimi göstərdi. Bu fikir bir daha təsdiq olundu: "Mövcudiyyət vətənin varlığı ilə ölçülür".
"Xaricdə – xüsusilə Amerikada – formalaşan və içimizə sızan bu şəbəkələrə, adı nə olursa olsun, imkan verilməməlidir. Bu, təkcə Türkiyə üçün deyil, Azərbaycan üçün də təhlükədir. FETÖ orduya “kozmik otaq”, “Balyoz” və “Ergenekon” əməliyyatları ilə sızdı. Vətənpərvər zabitlər, ictimai xadimlər sıradan çıxarıldı. Mənim də adım o proseslərdə hallanmışdı – həm Türkiyədə, həm Azərbaycanda. Eyni ssenari Azərbaycanda da baş verə bilərdi, çünki dövlət strukturlarına nüfuz etmişdilər. Gülən məktəblərində ideoloji təsir altına düşən kadrlar yetişdirilirdi. Bu gün də onların təsiri davam edir – həm Türkiyədə, həm Azərbaycanda, həm də Avropada "- deyə Rüstəmxanlı bildirdi.
"15 Temmuzda qalib gələn Türk milləti oldu. Allah bir daha Türkiyəyə belə bir faciəni yaşatmasın" - o fikrinin sonunda bildirdi.
Bənövşə Zahidli
15:53 15.07.2025
Oxunuş sayı: 6698
