Mərkəzi Elmi Kitabxanada akademik Ziyad Səmədzadənin kitab kolleksiyası yaradılıb
Azərbaycan Milli Elmlər Akademiyasının (AMEA) Mərkəzi Elmi Kitabxanasında (MEK) tanınmış iqtisadçı alim, Milli Məclisin deputatı, “Şöhrət” və “Şərəf” ordenli akademik Ziyad Səmədzadənin kitab kolleksiyası yaradılıb.
Kolleksiya akademik tərəfindən hədiyyə olunan 87 adda dəyərli nəşr əsasında formalaşdırılıb. Bu nəşrlər sırasında həm müəllifin şəxsi elmi əsərləri, həm də iqtisadiyyat, enerji, geosiyasi məsələlər və regional inkişafla bağlı müxtəlif mövzuları əhatə edən toplular yer alır.
Kolleksiyaya daxil olan nəşrlər sırasında “Heydər Əliyev və müasir Türk dünyası” mövzusunda beynəlxalq elmi-praktiki konfransın materialları, “İlham Əliyev: iqtibaslar və təhlil”, “Böyük iqtisadi ensiklopediya” (7 cilddə), “Bakı nefti qələbənin açarı”, “İqtisadi tərəqqiyə həsr edilən ömürlər”, “Onuncu beşillikdə Sovet Azərbaycanının iqtisadi və sosial inkişafı”, “Xəzər nefti. Azərbaycanın strategiyası. Regionun gələcəyi”, “Azərbaycan. Dinamik tarazlı, keyfiyyətli inkişaf”, “Science Without Borders”, “Akademik Ziyad Səmədzadənin elmi yaradıcılığı: Azərbaycanın XX əsr və müstəqillik dövründə iqtisadi inkişafın aktual problemləri”, “Ziyad Əliabbas oğlu Səmədzadə: Biobiblioqrafik göstərici”, “Çin qlobal dünya iqtisadiyyatında”, “Azərbaycan iqtisadiyyatı 100 ildə” (çoxcildlik), “Qarabağ iqtisadiyyatı 100 ildə” (V cild) və digərləri var.
Tədqiqatçılar, tələbələr və geniş oxucu auditoriyası üçün dəyərli elmi mənbə olan kolleksiya MEK-in Kitabxana fondlarının təşkili, mühafizəsi və istifadəsi şöbəsinin Azərbaycan dilində ədəbiyyat fonduna daxil edilib.
15:00 09.07.2025
Oxunuş sayı: 6888
