Vicdanla silahlanmış qəhrəmanlar... - Fidan Qarayeva yazır
Hər gecə bu şəhərin yollarında bir iz buraxılır. Bir ayaq səsləri – bəzən küləyin içində, bəzən sükutun içində eşidilir. Bu səslər nə sadəcə patrul xidmətinə aiddir, nə də təkcə rəsmi vəzifə daşıyıcısına. Bu səslər təhlükənin qarşısında dayanan, cəmiyyətin sabahı üçün bu gününü fəda edən insanların izidir. Onlar polislərdir. Və bu sətirlər sadəcə bir təşəkkür deyil – bir anlayış cəhdidir.
Azərbaycan polisi bu il 107 yaşını qeyd edir. Tarixi 1918-ci ilin isti iyul günlərinə gedib çıxır – Azərbaycan Xalq Cümhuriyyəti dövründə ilk polis strukturunun formalaşdığı vaxtlara. O gündən bu günə qədər dəyişən çox şey olub: sistemlər, texnologiyalar, metodlar. Amma dəyişməyən bir dəyər var – təhlükəni qarşılayan insanın qətiyyəti.
Bu yazını yazarkən statistikadan çox, simaları düşünürəm. Məsələn, gecə saat üçdə çağırışa gedən polis əməkdaşını. Uşağını məktəbə özü aparmağa fürsət tapmayan polisi. Təhlükəli əməliyyatda həyatını riskə atan, lakin ertəsi gün heç bir şikayət etmədən yenidən işə başlayan gənc zabiti. Onların hər biri yalnız uniforma deyil, eyni zamanda vicdan da daşıyır.
Bu sahənin çətinliyi ondadır ki, səhvləri görünür, amma fədakarlıqları çox zaman səssiz qalır. Mətbuatda görünən xəbərlər çox vaxt bir səhvi, bir insidentin ətrafını aydınlaşdırmaqla kifayətlənir. Amma kimsə səhər-səhər bir avtobus dayanacağında polisin kömək etdiyi yaşlı qadını yazmır. Kimsə valideynlərini itirmiş uşağın əlini tutan polis əməkdaşını gündəmin ortasına çıxarmır.
Bu peşə səbir istəyir. İntizam, ayıq zəka, təmkin, empatiya. Hər gün insan psixologiyasına toxunan bir vəzifənin içində olmaq – bu, artıq sadəcə iş deyil, bu bir həyat tərzidir. Elə buna görə də polislik həm güc, həm də ləyaqət tələb edən peşədir.
Azərbaycan polisi bu gün təkcə təhlükəsizliklə deyil, həm də ictimai etimadla işləyir. Rəqəmsal texnologiyalar – çevik reaksiya xidmətləri, ictimai qəbullar və şəffaflıq yönümlü islahatlar bu sistemin müasirləşməsinin nümunəsidir. Daxili İşlər Nazirliyinin regional bölmələri ilə vətəndaş arasındakı əlaqə indi daha açıq və qarşılıqlıdır. Amma bu texnologiyanın arxasında yenə də insan durur – bir əməkdaş, bir ailə başçısı, bir övlad.
Bəzən insanın niyə bu peşəni – bu qədər çətinliyi, təhlükəni seçib- sevdiyini soruşurlar. Niyə bu qədər riskin içində xidmət etməyə razı olur? Cavab, bəlkə də, sadədir: çünki cəmiyyətin təhlükəsizliyinə töhfə vermək, qanunun yanında olmaq bir vicdan çağırışıdır. Bəziləri üçün bu, sadəcə işdir. Amma digərləri üçün – bu, şəxsiyyətin parçasıdır.
Onların heç biri qəhrəman olduğunu iddia etmir. Amma onlar hər gün vəzifələrini yerinə yetirməklə, həyatın daha təhlükəli sətirlərində bizim üçün, ölkəmiz üçün dayaq olur. Deyərdim ki, onların varlığı çox zaman görünmür, amma yoxluqları dərhal hiss olunur.
Bu peşə nümayəndələri arasında mənim ailə üzvlərim də var. Onlar mənə hər zaman təhlükəsizliyin və etimadın dəyərini öyrətdi.
Bu gün də həmin əvəzolunmaz qəhrəmanları xatırlamaq, dəyərləndirmək və sadəcə təşəkkür etmək borcumuzdur. Onların "paqon"larında təkcə ulduzlar yox, həm də hiss edən, düşünən, sevən, qorxan və qoruyan insanlar var. Azərbaycan polisinin 107 illik tarixi, sadəcə keçmişi deyil, həm də bu günümüzün simasıdır.
Polis Günündə atamın və digər bütün polislərimizin özlərindən heç zaman gözlənilməyən fədakarlıqlarını nəzərə alaraq, onlara olan sonsuz minnətdarlığımı bildirirəm.
Atamın timsalında bütün Azərbaycan polislərini bu xüsusi gündə təbrik edir, onlara hər zaman qələbə və uğurlar arzulayıram.
Fidan Qarayeva
13:50 02.07.2025
Oxunuş sayı: 8697
